58 eldi meken kólik qatynasynsyz qaldy – Qanat Bozymbaev
«Sý tasqynyna qatysty jaǵdaı kúrdeli kúıinde qalyp otyr. 6 óńirde 3698 jeke úı sý astynda qaldy jáne avtojoldardyń 155 ýchaskesin sý shaıdy. Topan sý basqan 88 ýchaske baqylaýǵa alyndy, onyń ishinde 4 kópir bar. Sonymen qatar 58 eldi mekenge kólik qatynasy joq, olarǵa azyq-túlik pen dári-dármek jetkizilip jatyr», - dedi Qanat Bozymbaev OKQ-de ótken baspasóz máslıhatyna ZOOM arqyly qatysa otyryp.
Úkimet basshysy orynbasarynyń málimetinshe, el aýmaǵynda 10 óńirde jergilikti deńgeıde tótenshe jaǵdaı jarııalandy.
«Avarııalyq qutqarý jumystaryna 17 myńnan astam adam, 1900 tehnıkasy jáne 500-ge jýyq júzý men sý sorý quraldary jumyldyryldy. Tótenshe jaǵdaı jarııalanǵan aımaqtardan 70 myńnan astam adam kóshirildi, onyń 17 myńǵa jýyǵy bala. Aýa raıy boljamy boıynsha taıaý arada kún jylyp, qar jyldam erıdi jáne sý qoımalarynyń tolýy jalǵasady. Búginde el tóńireginiń 15%, al soltústik, shyǵys jáne ortalyq óńirlerde 40% jýyq qar jatyr», - deıdi ol.
Eske sala keteıik, buǵan deıin Qazgıdromet sý basqan óńirlerdegi aýa raıy boljamyn jarııalady. Sondaı-aq elimizdegi sý basqan óńirlerdiń balalary saýyqtyrý ortalyqtaryna jiberilip jatyr.