550 jyl buryn derbes el bolǵan qazaq eliniń endigi keleshegi kemel - Ábish Kekilbaev

ASTANA. QazAqparat - 550 jyl buryn derbes el bolǵan qazaq eliniń endigi keleshegi kemel. Búgin Astanadaǵy Táýelsizdik saraıynda ótip jatqan Qazaq handyǵynyń 550 jyldyǵyna arnalaǵan Saltanatty sharaǵa oraı QazAqparat tilshisine óz pikirin bildirgen QR Eńbek Eri, Qazaqstannyń halyq jazýshysy, memleket jáne qoǵam qaıratkeri Ábish Kekilbaev osylaı dedi.

«Búgingi toı - erekshe toı. Qazaqtyń basynan jaqsy da, jaman da ótti. Budan 550 jyl buryn óz aldymyzǵa derbes el boldyq. Sodan beri qaraı Edil men Altaıdyń arasyn, soltústikten Qumdykól, ońtústikte Myrzashólge deıingi ıen dalany jaılaımyz. Bizdiń osy dáýirge jetkenimiz de, jetpegenimiz de bar. Jer betindegi halyqtyń qaı-qaısysynyń basynda kúı mundaı emes. «Bireýdi kórip shúkir et, bireýdi kórip pikir et» degen. Qudaıǵa shúkir qazaq halqynyń basynda shúkirshilik etetin jaǵdaı jetkilikti», - dedi Ábish Kekilbaev.

Sóz arasynda Ábish Kekilbaev Qazaqstannyń BUU múshesi bolǵanyn, Eýropadaǵy Qaýipsizdik pen Yntymaqtastyq Uıymyna tóraǵalyq etkenin, Dúnıejúzilik saýda uıymyna múshe bolyp, EKSPO-2017 halyqaralyq kórmesi ótetinine nazar aýdardy.

«Munyń bárin osy dáýirde kórgen el de, kórmegen el de bar. 550 jyl buryn derbes el bolǵan qazaq eliniń keleshegi kemel. Biz alda turǵan bolashaǵymyzǵa úlken úmitpen qaraımyz. Onyń sáýletti de kemel ekenine de kózimiz jetedi. Aman bolsaq áli de talaı qyzyqtarǵa jetemiz dep senemin», - dedi Ábish Kekilbaev.