550-den asa áskerı qyzmetshi oqýshylarǵa arnalǵan erlik sabaqtaryn ótkizdi
Oǵan Qorǵanys mınıstrligi men QR Qarýly Kúshteriniń áskerı qyzmetshileri belsene atsalysty, dep habarlaıdy QR QM baspasóz qyzmeti.
Elimizdiń mektepterinde jańa oqý jylyndaǵy alǵashqy sabaq QR Táýelsizdiginiń 25 jyldyǵyna arnalǵan «Máńgilik el» patrıottyq aktsııasy aıasynda ótken «Erlik sabaǵy» boldy. Qorǵanys mınıstrligi men Bas shtabynyń basshylary, Qarýly Kúshterdiń ardagerleri, ınternatsıonal jaýyngerler oqýshylarǵa arnap sabaqtar ótkizdi. Erlik sabaqtarynyń ótkizilýine barlyǵy 550 adam, onyń ishinde, Qarýly Kúshter túrleriniń bas qolbasshylary, óńirlik qolbasshylyq áskerleriniń qolbasshylary, áskerı bólimderdiń komandırleri, qorǵanys isteri jónindegi departamentterdiń bastyqtary men olardyń orynbasarlary qatysty. Arasynda ushqyshtar, teńizshiler jáne basqalar da bolǵan sabaqta áskerı qyzmetshiler oqýshylarǵa patrıotızm, elimizge degen maqtanysh sezimin oıatty, shynaıy patrıot jáne Otan qorǵaýshy beınesin qalyptastyrýǵa tárbıeleý týraly áńgimelep berdi. Oqýshylardy elimiz ben ólkemizdiń tarıhymen tanystyrdy.
«Otandy qorǵaý ejelden beri kóshpeli qazaq halqynyń abyroıly isi, ishki genetıkalyq kody bolyp tabylǵan. Erkindik pen táýelsizdikke qol jetkizý shejiresi halqymyzdyń jarqyn beınesinde máńgi óshpes iz qaldyrǵan ata-babalarymyzdyń uly batyr erlikterimen aıshyqtalǵan. Elimizdiń qaýipsizdigi úshin armııamyzdyń mańyzdylyǵy qanshalyqty bolsa, oǵan degen qarym-qatynasymyz da qurmetti bolýy lázim. Áskerıdiń kásibi qurmetti bolǵanymen, qıynnyń qıyny bolyp keledi. Óıtkeni, jaltaqtamaı qıyn-qystaý sátterde jáne beıbit ýaqytta Otandy qorǵaýǵa mindetteıdi. Beıbit azamattardyń joǵary senimine ıe bolyp, olardyń úkilegen úmitin aqtaý úshin ar-ojdan, abyroı jáne mindetpen atqarý isi ońaı sharýa emes», - dedi Astana q. №25 orta mektebindegi sabaqta Bas shtab bastyǵynyń orynbasary - QR QK BSh Tárbıe jáne ıdeologııalyq jumystar departamentiniń bastyǵy, general-maıor Muhamedjan Talasov.