55 jasqa tolǵan shahterlerge tólenetin áleýmettik tólemniń somasy belgili boldy

<p>2024 jyldan bastap zııandy eńbek jaǵdaıynda jumys isteıtin 37 myń adam arnaıy áleýmettik tólem alady. Bul týraly Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov aıtty, dep habarlaıdy <a href="https://kaz.inform.kz/?_gl=1*1cookbu*_ga*MTMxOTQ2NjU5MC4xNjk4Mzc1OTcw*_ga_Y44SMVECD5*MTY5ODM3NTk2OS4xLjAuMTY5ODM3NTk2OS42MC4wLjA.&amp;pk_vid=1dac2fba2c02ff6916983759715aaacc" target="_blank" rel="noopener">Kazinform</a>.</p>

«Ortasha eseppen alǵanda, arnaıy áleýmettik tólem 200 myń teńgeni quraýy múmkin. Onyń quramynda tórt baǵyttan tólenetin qarajat qamtylady. Biz buǵan deıin 1,5 shamasynda eń tómen kúnkóris deńgeıin belgilegen edik. Depýtattar, ony 2 eń tómen kúnkóris deńgeıine deıin jetkizýdi usyndy. Bul rette tórt qarjy kózinen alynatyn jalpy arnaıy áleýmettik tólem 200 myń teńgeden asyp túsýi múmkin», - dedi A. Sarbasov Parlament Májilisinde tilshiler suraǵyna jaýap bere otyryp.

Atap aıtqanda, arnaıy áleýmettik tólem birneshe komponentten turady jáne tórt qarjy kózi qamtylady. Birinshiden, respýblıkalyq bıýdjetten 1,5 shamasynda eń tómen kúnkóris deńgeıi mólsherinde arnaıy kásiptik tólem bar. Ekinshiden, BJZQ-dan mindetti kásiptik zeınetaqy jarnalary men jınaqtalǵan zeınetaqy jınaqtaryn eskere otyryp, mindetti zeınetaqy jarnalary esebinen de iske asyrylady. Úshinshiden, ómirdi saqtandyrý jónindegi kompanııalardan 1 eń tómen kúnkóris deńgeıi mólsherinde eskeriledi. Tórtinshiden, jumys berýshilerdiń qarajaty esebinen 1 eń tómen kúnkóris mólsherinde júzege asyrylady.

«Zııandy eńbek jaǵdaıynda jumys isteıtin adam 55 jasqa tolsa, arnaıy áleýmettik tólemdi osy adamdar 63 jasqa deıin alady. Keıin bul azamattarǵa zeınetaqy tólenedi, ıaǵnı arnaıy tólem toqtaıdy», - dedi vıtse-mınıstr.

Sonymen qatar ol bul múmkindikti paıdalana alatyn adamdardyń sanyn aıtty.

«55/7 krıterııleri boıynsha (jumysshy 55 jasqa tolyp, jeti jyl eńbek ótili bolýy tıis) qazir bizde osyndaı adamdar jumys isteıtin 1400-ge jýyq kásiporyn bar. 2024 jyly bul quqyqty 37 myń adam paıdalana alady, ıaǵnı olar zııandy eńbek jaǵdaıynda jumys istep jatyr. Eger salalar boıynsha aıtsaq, onda basym úlesi taý-ken sektory men óńdeý ónerkásibine tıesili», - dedi A. Sarbasov.