5460 almatylyq telemedıtsına ortalyǵynyń baqylaýynda

ALMATY. QazAqparat - Almatyda koronavırýs juqtyrǵan 244 adam jalpy reanımatsııa jáne qarqyndy terapııa bólimshesinde em qabyldap jatyr. Bul týraly qalalyq Qoǵamdyq densaýlyq saqtaý basqarmasynan málim etti, dep habarlaıdy QazAqparat tilshisi.

3 mamyr kúngi aqparat boıynsha, bir táýlikte qalada 667 adam koronavırýs juqtyrǵan. Munyń ishinde sımptomdy, jeńil jáne ortasha deńgeıdegi belgilermen - 589, sımptomsyz – 78 naýqas tirkeldi.

«Reanımatsııa jáne qarqyndy terapııa bóliminde 244 adam jatyr. Al 46 naýqas jasandy tynys alý apparatyna qosylǵan. Invazıvti emes jasandy tynys alý apparatynda 78 adam em qabyldaýdy jalǵastyrýda. High flow-da 77 apparat jumys isteıdi»,- dep habarlady basqarmadan.

Medıtsınalyq-sanıtarııalyq alǵashqy kómek mobıldi brıgadalarynyń jáne Telemedıtsına ortalyǵynyń ambýlatorııalyq baqylaýynda 5460 patsıent bar. Onyń ishinde 4830 adamda indet belgileri bolǵan, olar ortasha aýyr jaǵdaıda. 630 adamda koronavırýs belgileri joq.

Bıylǵy jyldyń 1 aqpany men 2 mamyr aralyǵynda barlyǵy 222 754 adamǵa ekpe salyndy.

Ótken táýlikte 2 726 adam vaktsına aldy.