542 saıabaq: Almaty qalasynyń 36 paıyzy jasyl jelekpen qamtylǵan

<p>ALMATY. KAZINFORM &mdash; Almatynyń 25,4 myń gektary jasyl jelekpen qamytylǵan. Bul týraly Ekologııa jáne qorshaǵan ortany qorǵaý basqarmasynyń basshysy Mıras Gaısın Almatyda ótip jatqan Ortalyq Azııa ósimdik tálimbaqtary qaýymdastyǵynyń II konferentsııasynda aıtty.</p>

Basqarma basshysynyń aıtýynsha, Almaty respýblıkadaǵy eń jasyl qalalardyń biri. Megapolıstiń 68 myń gektar aýmaǵynyń 25,4 myń gektary nemese 36%-y jasyl jelekpen qamtylǵan.

«Qalada aýmaǵy 977 gektar bolatyn 542 saıabaq bar. Almatyda shamamen 4 mıllıon jasyl jelek ósedi, al jan basyna shaqqandaǵy kógaldandyrý deńgeıi 12 sharshy metrden asady. Memleket basshysynyń tapsyrmasyna sáıkes, 2030 jylǵa qaraı Almatyda jasyl qordy 6,5 mıllıon aǵashqa deıin arttyrý josparlanyp otyr», — dedi Mıras Gaısın.

Sondaı-aq, ol bıyl 4 nysannyń qurylysy qolǵa alynyp, kelesi jyly 6 jańa saıabaq salynatynyn jáne qoldanystaǵy altaýy qaıta jańartylatynyn atap ótti. Jańa saıabaq aımaqtarynyń biri — Saıran kóliniń aýmaǵy, onda qazirgi ýaqytta jumystar júrip jatyr. Keler jyldyń kókteminde Saıran jaǵalaýy boıyna 4 myń aǵash, 300 myń sharshy metrge túrli shópter otyrǵyzylady jáne 7 myń sharshy metr qorshaýlar men gúlzarlar ornatylady.

Eske salaıyq, buǵan deıin Almatydaǵy Saıran kóliniń jaǵalaýyn abattandyrýǵa qosymsha 4 mlrd teńge bólinetinin jazǵanbyz.