500 jasóspirim «Jas ulan» qataryna qosyldy

ASTANA. QazAqparat - Respýblıkalyq áskerı mektep-ınternattarda tárbıelenýshilerdi oqýǵa irikteý aıaqtaldy. Áskerı bolýdy armandaıtyn Qazaqstannyń túkpir-túkpirinen kelgen jasóspirimder konkýrstyq irikteýden ótti. Bıylǵy jyly Astana, Almaty, Shymkent jáne Qaraǵandy qalalaryndaǵy «Jas ulan» tórt respýblıkalyq áskerı mektebine 497 ulan oqýǵa tústi.

Bozbalalarǵa psıhologııalyq testileýden, dene daıarlyǵynan, medıtsınalyq kýálandyrýdan jáne t.b. ótýge týra keldi. 2015 jyldan bastap mektepke 9-synyptan keıin qabyldaıdy, dep habarlaıdy QR Qorǵanys mınıstrliginiń baspasóz qyzmeti.

Oqytý baǵdarlamasyna memlekettik jáne shetel tilderin, áskerı pánderdi oqý jáne kúsheıtilgen dene daıyndyǵy kiredi. Mekteptiń birshama túlekteri ofıtser atanyp, qazirgi kezde Qazaqstannyń Qarýly Kúshterinde jáne ózge de áleýetti qurylymdarda qyzmet atqarýda.

Jyl saıyn elimizdiń barlyq aımaǵynan «Jas ulan» respýblıkalyq áskerı mektepterine 70-ten bastap 100 balaǵa deıin oqýǵa túsedi. Jasulandyqtardyń daıyndyq deńgeıi jyl saıyn ósip keledi. Oqytý úderisiniń is júzindegi mańyzdylyǵy joǵarlady, tárbıelenýshilerdiń zııatkerlik turǵyda damýyna erekshe kóńil bólinedi. Barlyq oqý-tárbıe protsesi balanyń kishkentaı kezinen bastap óz Otanyna adal bolýyna, ony súıýge jáne ultjandy bolýyna baýlýǵa baǵyttalǵan.