500 myń oqýshyǵa memleketten 22,2 mlrd teńgeniń qoldaýy kórsetildi

<p>ASTANA. KAZINFORM - Memleket áleýmettik jaǵynan osal otbasylardaǵy 500 myńnan astam balaǵa qoldaý kórsetti. Bıylǵy jyly jalpyǵa birdeı bilim berý qorynan ata-analardyń esepshottaryna 22,2 mlrd teńgeden astam qarajat aýdaryldy, dep habarlaıdy QR Oqý-aǵartý mınıstrliginiń baspasóz qyzmeti oblystyq bilim basqarmalaryna silteme jasap.</p>

Qoldaý ataýly áleýmettik kómek (AÁK) alatyn, tabysy eń tómengi kúnkóris deńgeıinen tómen otbasylardaǵy oqýshylarǵa, jetim jáne ata-anasynyń qamqorlyǵynsyz qalǵan balalarǵa, sondaı-aq tótenshe jaǵdaılar saldarynan shuǵyl kómekke muqtaj otbasylardaǵy mektep oqýshylaryna kórsetildi. Jergilikti atqarýshy organdardyń málimeti boıynsha, ótinish bergenderdiń 100 paıyzy memleketten qarjylaı kómek alǵan.

«Buǵan deıin Oqý-aǵartý mınıstrligi kómek kórsetý mehanızmin, onyń ishinde ata-analardyń esepshottaryna aqsha aýdarýdy jetildirý boıynsha sharalar qabyldaǵan bolatyn. Bul shara ata-analar men balalarǵa kıim-keshek pen oqý quraldaryn jetkizýshilerdi óz betinshe tańdaýǵa múmkindik berdi, osylaısha sapasyz taýarlardy alýdy boldyrmaıdy. Bıylǵy jyly árbir oqýshyǵa ortasha eseppen 45 myń teńge shamasynda qarajat bólindi», - dep atap ótti Balalardyń quqyǵyn qorǵaý komıteti tóraǵasynyń orynbasary ıÝlııa Ovechkına.

Sondaı-aq Oqý-aǵartý mınıstrliginiń bastamasymen jyl saıyn 30 qyrkúıekke deıin jalǵasatyn «Mektepke jol» respýblıkalyq qaıyrymdylyq aktsııasy ótkiziledi. Búgingi kúni aktsııa aıasynda ondaǵan myń otbasy demeýshilerdiń kómegine ıe boldy.