500-den astam jastar jobasyna 1 mıllıon teńgeden grant berilgen
Halyqaralyq qaıta qurý jáne damý banki men QR Bilim jáne ǵylym mınıstrliginiń birlesken jobasy 2017 jyly Almaty, Qaraǵandy, Pavlodar jáne Ońtústik Qazaqstan oblystarynda iske qosylǵan. Jastardy, ásirese osal toptardy qoǵamdyq paıdaly qyzmet daǵdylaryna tartýǵa baǵyttalǵan joba 2020 jylǵa deıin jalǵasady jáne Qazaqstannyń barlyq óńiri boıynsha 8 500 adamdy qamtý josparlanǵan.
Pavlodar oblysy boıynsha «Zhas project» óńirlik úılestirýshisi Dınara Aıtjanovanyń aıtýynsha, jobalardyń bir bóligi aldaǵy ýaqytta qarjylyq kiris ákele alady.
«Jobanyń negizgi maqsaty - jastarǵa ómirlik mańyzy bar daǵdylardy úıretý jáne áleýmetke paıdaly jobalaryn júzege asyrý úshin 1 mıllıon teńgeden qarajat bólý. Keı jobalar bolashaqta kommertsııalandyrylýy múmkin, máselen bizdegi 5-6 joba tigin tsehtaryn qurýǵa baǵyttalǵan. Balalar qarajatty tigý men pishý sabaqtaryna jáne qural-jabdyq satyp alýǵa jumsady. Joba aıaqtalǵan soń, qural-jabdyqtardy ózderinde qaldyryp, jumystaryn jalǵastyra alady», - dedi ol.
Alaıda jobanyń negizgi maqsaty tabys tabý emes, qoǵamǵa paıda tıgizý.
«Barlyq áleýmettik mańyzy bar jobalardyń bolashaqta qarjylyq qaıtarymy bola bermeıdi. Bizde turaqty mekenjaıy joqtarǵa tamaq berip, monshaǵa aparyp, kıimin aýystyratyn balalar bar. Taǵy bir joba aıasynda bir qyz túski as daıyndap, syrtqa shyǵa almaıtyn jalǵyzbasty jandarǵa taratyp shyqty», - dep atap ótti D. Aıtjanova.
Jalpy alǵanda, joba júrgizilgen bes aıda eki myńnan astam adam óz áleýmettik ıdeıalaryn júzege asyra aldy. Synamaly óńirlerde 79 sporttyq nysan boı kóterdi, onyń arasynda klýbtar, jattyǵý zaldary jáne úıirmeler bar. 19 týrıstik jáne skaýt jasaǵy óz óńirlerinde sporttyq jáne zertteý jumystaryn júrgizý úshin qural-saımandarǵa ıe boldy. Jastar 94 oıyn-saýyq klýby men túrli baǵyttaǵy (teatr, vokal, bı jáne aspap úıirmeleri, kınozaldar men stýdııalar) úıirmeler, 37 tigin jáne toqý atelesin, 29 kompıýterlik jáne 27 tildik kýrstar jáne 19 shashtaraz ashqan. Aýylǵa qoldaý kórsetý maqsatynda jastar aýyl sharýashylyǵy ónimderin óndirý boıynsha 37 joba ázirledi.