50 myńǵa jýyq qazaqstandyq ózin bankrot dep jarııalaý týraly ótinish berdi

ASTANA. QazAqparat – Elimizde bankrot mártebesin alýǵa ótinish qabyldaý jalǵasyp jatyr. Osy ýaqytqa deıin 49 113 azamattan ótinish tústi.

Bul týraly Qarjy mınıstrligi memlekettik kirister komıteti bereshekpen jáne dármensiz boryshkerlermen jumys basqarmasy basshysynyń orynbasary Merýert Sısembaeva málim etti, dep habarlaıdy QazAqparat tilshisi.

«3 naýryzdan bastap elimizde azamattardyń ózin bankrot dep jarııalaýǵa ótinish qabyldana bastady. Búgingi jaǵdaı boıynsha 49 113 azamat bankrot mártebesin alýǵa ótinish berdi. Ótinishter qaralyp jatyr, degenmen basym bóligi boıynsha bas tartylyp jatyr. Statıstıkaǵa súıensek, 36 myńǵa jýyq azamattyń ótinishi keri qaıtaryldy. Al 6058 klıenttiń sotsyz bankrot ataný ótinishi rásimdeldi», - dedi Merýert Sısembaeva memlekettik kirister komıtetiniń Instagram paraqshasynda ótken tikeleı efır barysynda.

Onyń aıtýynsha, ótinish 15 jumys kúni ishinde qaralady. Oǵan quzyrly memlekettik organdar jáne kirister komıteti jaýapty.

«Bankrot atanýǵa nıet bildirgender qoıylatyn talaptardyń biri sońǵy 12 aı ishinde tólem boıynsha bereshegi bolmaýy tıis. Joǵaryda aıtqanymdaı, 36 azamattyń ótinishi qanaǵattandyrylmady, sonyń ishinde 55%-da bereshegi bar bolyp shyqty, sondyqtan da bas tartyldy. Osy oraıda klıentter bankrot atanýǵa ótinish berer aldynda qajetti málimetterdi kredıttik bıýrodan aldyn ala bilip alsa deımiz», - deıdi ol.

Buǵan deıin Qarjy mınıstrligi bankrot mártebesin alýǵa berilgen ótinish qanaǵattandyrylmaı, bas tartqan jaǵdaıda onyń sebepterin joıý úshin quzyrly memlekettik organdarǵa júginýge bolatynyn habarlaǵan edi.

Eske salaıyq, bıyl 3 naýryzda elimizde bankrottyqqa ótinim qabyldaý bastaldy. Atalǵan protsess týraly tolyǵyraq osy silteme arqyly tanysýǵa bolady.