«50 myń qandasymyz qujatsyz júr» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 8 tamyz, juma kúni jaryq kórgen respýblıkalyq buqaralyq aqparat quraldarynda jarııalanǵan ózekti materıaldarǵa sholýdy usynady.

Keshe Elbasy Nursultan Nazarbaevtyń Pavlodar oblysyna jumys sapary odan ári jalǵasty, dep habarlaıdy «Egemen Qazaqstan» gazeti. Sapar barysynda Elbasy Pav­lodar oblysynyń jurt­shy­lyq ókilderimen jáne kásipkerlerimen kezdesti.

«Kezdesý kezinde Memleket bas­­shysy Qazaqstannyń qýatty ın­dýstrııalyq ortalyǵy bolyp sanalatynyn aıtyp, oblystyń birqatar kásiporyndarynyń jumy­symen tanysqanyn atap ótti. - Óńir ónerkásip jáne aýyl sharýa­shylyǵyn qosa qamtı otyryp, barlyq baǵytta damyp kele­di. Shaǵyn jáne orta bıznesti qol­daýǵa basymdyq bergen jón, memleket bul salaǵa qajetti jaǵdaı jasaýda, sonyń ishinde jeńildikpen nesıeler berilýde, - dedi Nursultan Nazarbaev», - delingen « Kásiporyndar keleshegi kemel » atty taqyryppen jarııalanǵan maqalada.

Gazettiń jazýynsha, Memleket basshysy óńirdegi ónimderdiń edáýir bóligi ózge oblystardan, sondaı-aq Reseıden ákelinetinine nazar aýdardy. Soǵan oraı Pavlodar oblysy bar múmkindikterdi eskere otyryp, azyq-túlikpen ózin ózi qamtamasyz ete alatynyn atap aıtty.

« Egemen Qazaqstan » basylymy óziniń kezekti maqalasynda Qazaqstanda kásipkerlerdi qoldaý jańa qarqynmen jalǵasatyndyǵyn jazýda.

Gazettiń habarlaýynsha, keshe osy máselege qatysty Ortalyq kommýnıkatsııalar qyzmetinde Ulttyq kásipkerler palatasynyń basqarma tóraǵasy Abylaı Myrzahmetov baspasóz máslıhatyn ótkizdi. Ol 6 tamyzda Memleket basshysynyń qatysýymen ótken Úkimettiń keńeıtilgen otyrysynda qaralǵan máseleler jóninde aıta kelip, kásipkerlerdi qoldaý baǵdarlamasy jóninde áńgimeledi.

«Elbasy Nursultan Nazarbaev únemi kásipkerlikti damytýǵa qamqorlyq jasap, saladaǵy ár istiń oryndalýyn óz baqylaýynda ustap júrgeni málim. Sonyń biri, kásipkerlikti qoldaýdyń biregeı baǵdarlamasyn ázirleýdi tapsyrǵan bolatyn. «Elbasy tapsyrǵan Kásipkerlikti qoldaýdyń biregeı baǵdarlamasy aǵymdaǵy jyldyń jeltoqsan aıyna deıin qabyldanýy kerek. Sosyn ol kelesi jyldyń basynan kúshine enedi dep oılaımyz. Bul baǵytta jumys atqarylýda, Úkimet pen ulttyq palata arasynda birlesken jumys toby da qurylǵan. Bul baǵdarlama buǵan deıingi isterimizdi úılestiretin bolady. Jalpy, qazirgi kúni elimizde kásipkerlikti qoldaýǵa baǵyttalǵan 8 baǵdarlama bar. Mine, osy 8 baǵdarlamanyń 8 operatory bolsa, 8 túrli júıemen qyzmet usynady. Árqaısysy ár baǵytta bolǵandyqtan, kásipkerlerge keıbir qıynshylyqtar da týyp otyr. Sondyqtan da, biregeı baǵdarlama solardyń barlyǵyn bireýge ǵana biriktiredi. Sosyn buǵan jaýapty operator da burynǵydaı ár saladaǵy 8 emes, tek bireý ǵana bolady. Taǵy bir erekshelik - Elbasy tapsyrmasyna sáıkes, baǵdarlama ishindegi qarjylaı emes kómekterdiń barlyǵy kelesi jyldyń basynan bastap Ulttyq kásipkerler palatasyna beriletin bolady», - dep keltiriledi palata tóraǵasynyń sózi « Ýaqyt talaby týyndatqan qadam » atty materıalda.

« Aıqyn » basylymynyń búgingi jarııalanymynda « 50 myń qandasymyz qujatsyz júr » atty maqala basylǵan.

Qazaqstan Prezıdenti Nazarbaev «Sońǵy ýaqytta syrttan elge kóship kelýshi oralmandardyń sany azaıdy. Buǵan bóletin memlekettiń aqsha somasy da tómendedi, biraq biz qarajatty bólýge daıynbyz.

Sonymen qatar olar qazaq­standyq memorgandar kórsetken jerlerge bet alýy tıis. Tek sonda ǵana járdem kórsetilýi tıis. Sondyqtan oral­mandardy qabyldaý jumysyn qaıta bastańdar. Oral­mandardy jumys orny, jaǵdaıy, ornalasatyn oryndary bar jerlerge, soltústikke, ortalyqqa, shyǵys pen batysqa ornalastyrý kerek» dedi. Bul týraly Elbasy sársenbi kúni úkimettiń keńeıtilgen otyrysynda málim etti.

«Jergilikti qóshi-qon basqarmasynyń bosaǵasynda aılap-jyldap azamattyq ala almaı júrgenderdiń naqty sany jóninde júıeli aqparat joq. Beıresmı statıs­tıkalyq málimetterge súıensek, ártúrli sebeptermen azamattyq ala almaı júrgen oralmandardyń sany 50 myńnan asyp jyǵylǵan. Keıin bul derekti Májilistiń áleýmettik-mádenı damý komıtetiniń ishki jáne syrtqy kóshi-qon máseleleri tal­qylanǵan otyrystarynyń birinde Іshki ister mınıstrligi Kóshi-qon polıtsııasy departamentiniń bastyǵy Serik Saıynov ta rastady. «Qazaqstanda 165 myńǵa tarta sheteldik azamattar turaqty túrde turyp jatyr. Olardyń úshten biri, ıaǵnı 50 myń­nan astamy - áli azamattyq ala almaǵan oralmandar» dep atap ótken-di», - delingen saraptama materıalda.

Batys pen Reseı arasyndaǵy «sanktsııalar shaıqasynan» Qazaqstan utýy múmkin, dep jazady «Aıqyn».

Keshe Prezıdent janyndaǵy Ortalyq kommýnıkatsııalar ortalyǵynda jýrnalıstermen kezdesken Ulttyq kásipkerler palatasynyń basqarma tóraǵasy Abylaı Myrzahmetov Reseıdiń «Kúnbatysqa» «jaýap-sanktsııala­rynan» elimizdiń paıda tabýdy oılastyryp jatqanyn jarııa etti.

- Elbasy Qazaqstannyń ustany­myn aıtty: biz beıbit sheshilýin, baı­saldy dıalogtyń ornaýyn jaqtaımyz. Biraq soǵan deıin birqatar múmkindik­ter biz úshin de paıda bolýda. Moldavııa, Pol­sha sekildi azyq-túlik, jemis-kók­ónisti dástúrli jetkizýshi elderge qarsy Reseıdiń sanktsııalar engizgenin kórip otyrmyz. Árıne, onyń ornyna Reseı tól óndirisin damytýǵa tyrysatyny túsinikti. Degenmen biz de qarap qal­maı­myz. Sanktsııaǵa ilikken salalarda biz otandyq óndiristi óristetýge tıispiz. Bul, ásirese, aýyl sharýashylyǵynda qoldan keletin dúnıe,- dedi Aby­laı Myr­zahmetov.

Tolyǵyraq, «Sanktsııa shaıqasynan» Qazaqstan utýy múmkin» atty maqalada.

Valıýta aıyrbastaý pýnkteri teńge devalvatsııasy týraly alyp-qashpa áńgimeden paıda taýyp otyr. «Rossııa 24» telearnasyna bergen suhbatynda Ulttyq banktiń burynǵy tóraeasy Grıgorıı Marchenko osyndaı pikir bildirdi. Bul týraly «Ekspress K» habarlap otyr.

«Ol valıýta aıyrbastaý pýnkteriniń ıeleri memlekettiń qarjylyq basshylyǵy qazaqstandyq teńgeniń baǵamyn «qulatqaly» jatyr degen daqpyrtty taratyp jibergenderine senimdi», - delingen « Bıtva tverdyh valıýt » atty maqalada.