5 jylda memlekettik qoldaý 744 myńnan astam adamǵa kórsetildi - Dúısenova

ASTANA. QazAqparat - Bastamalarǵa qoldaý jasalmaǵan jaǵdaıda halyqtyń jumyssyzdyq deńgeıi búginde 5,8 paıyzǵa jetýi yqtımal edi. Bul týraly búgin Astanada QR Densaýlyq saqtaý jáne áleýmettik damý mınıstri Tamara Dúısenova málim etti.

«Ótken bes jyldyń ishinde baǵdarlama aıasynda atqarylǵan sharalar eńbek naryǵyndaǵy sandyq ári sapalyq mándegi negizgi kórsetkishterdiń oń qarqynyna óz úlesin qosty dep aıtýymyzǵa bolady. 2010-2015 jyldary statıstıkalyq málimetterge qaraıtyn bolsaq, jumyspen qamtylǵan azamattardyń jalpy sany elimizde 6,3 paıyzǵa, al mekemelerde jumys isteıtin jaldamaly qyzmetkerlerdiń, ıaǵnı eńbek shartymen qyzmet isteıtin qyzmetkerlerdiń sany 17 paıyzǵa kóbeıdi. Bul ekonomıkada jańa jumys oryndarynyń ashylǵanyn jáne osy oryndarǵa el azamattarynyń eńbekke tartylǵanynyń aıqyn dáleli.

«Jumyspen qamtýdyń jol kartasy - 2020» aıasynda, ıaǵnı 5 jylda memlekettik qoldaý sharalary 744 myńnan astam adamǵa kórsetildi»,-dedi T. Dúısenova Senatta ótken «QR Prezıdentiniń 2015 jylǵy 30 qarashadaǵy Joldaýy aıasynda Jumyspen qamtýdyń jol kartasyn quqyqtyq qamtamasyz etý sharalar týraly» taqyrybyndaǵy dóńgelek ústel otyrysynda.

Budan bólek, mınıstr aǵymdaǵy jyly 9 myńnan astam shaǵyn nesıelerdi bólý eskerilgenin jáne ony alatyndar aýyldyq jerlerde qosymsha 12 myńǵa jýyq jumys oryndaryn quratynyn jetkizdi.

Onyń sózine qaraǵanda, kásipkerlik bastamalarǵa qoldaý jasalmaǵan jaǵdaıda halyqtyń jumyssyzdyq deńgeıi búginde 5,8 paıyzǵa jetýi yqtımal edi.