5 jyl ishinde Qazaqstandaǵy beınebaqylaý kameralarynyń sany 75 paıyzǵa kóbeıedi - Bas prokýratýra

ASTANA. 24 mamyr. QazAqparat - 2013-2017 jyldarǵa arnalǵan Dinı ekstremızmmen jáne terrorızmmen kúres jónindegi memlekettik baǵdarlamada dinı ekstremızm men terrorızmdi der kezinde anyqtap, jolyn kesý máseleleri boıynsha múddeli memorgandar qyzmetiniń tıimdiligin arttyrýǵa basty nazar aýdarylady.

Bul týraly búgin Bas prokýratýra janyndaǵy Zańdylyqty qamtamasyz etý jónindegi Qoǵamdyq keńestiń májilisinde Bas prokýratýranyń resmı ókili Nurdáýlet Súıindikov málim etti.

«Bizdiń oıymyzsha, Baǵdarlamany júzege asyrý 2017 jylǵa qaraı barlyq quqyqqorǵaý organdary jáne ekstremızm men terrorızmge qarsy qyzmet atqaratyn arnaıy organdar qyzmetkerleriniń biliktiligin arttyrýǵa múmkindik beredi», - dedi N. Súıindikov.

Onyń aıtýynsha, osy merzimge deıin ekstremızm men terrorızmge qarsy qyzmet salasyndaǵy tártip saqtaý organdarynyń zamanaýı tehnıkamen, qarý-jaraqpen jáne basqa da jańa tehnologııamen jabdyqtalý mólsheri jalpy qarý-jaraq pen arnaıy tehnıkanyń 30 paıyzynan kem bolmaıdy.

«Baǵdarlama, sonymen qatar, eldi mekenderdiń odan ári zamanaýı elektrondy qaýipsizdik júıelerimen qamtamasyz etile berýin da nazardan tys qaldyrmaıdy. Boljam boıynsha, 5 jyldan soń kóshelerge ornatylatyn beınebaqylaý kameralary 2013 jylmen salystyrǵanda 75 paıyzǵa kóbeıtiletin bolady», dep atap ótti N. Súıindikov.