5 jylda sportty damytý baǵytynda qandaı aýqymdy sharalar atqaryldy
QR Týrızm jáne sport mınıstrligi Sport jáne dene shynyqtyrý isteri komıtetiniń málimetine súıensek, jattyqtyrýshy-oqytýshylardyń, pedagog qyzmetkerleriniń bazalyq jalaqysy 2020 jyldan bastap 4 jyl ishinde jyl saıyn 100%-ǵa ósti. Olardyń qatarynda balalar-jasóspirimder sport mektebi, olımpıada rezerviniń mamandandyrylǵan mektep-ınternat-kolledjiniń qyzmetkerleri bar.
«Bul ıgilikti ister QR Prezıdentiniń 2019 jylǵy 2 qyrkúıektegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn oryndaý maqsatynda júzege asýda. Azamattyq qyzmetshilerdiń, onyń ishinde jattyqtyrýshy (sportty damytý dırektsııasy, joǵary sport sheberligi mektebi, olımpıada rezervin daıarlaý ortalyǵy) qyzmetkerler úshin 2022 jyldan bastap 2025 jylǵa deıin jyl saıyn laýazymdyq jalaqynyń mólsherine túzetý koeffıtsıenti 1-den 2-ge deıin ósýde. Bıyl atalǵan koeffıtsıent 1,71 quraıdy. Sport mektepteriniń jattyqtyrýshy-oqytýshylaryn azamattyq qyzmetkerler reestrine engizildi. Bul ózgeris nátıjesinde olardyń biliktiligine baılanysty 6 myńnan 22 myń teńgege deıin ústemaqy tólenedi», - dep atap ótti vedomstvodan.
Vedomstvo málimetinshe, dene shynyqtyrý jáne sport salasynda kásipter boıynsha kásibı standarttar bekitildi, Atap aıtqanda, olardyń qatarynda «Sport sektsııalarynda jattyǵýlar men oqytýdy uıymdastyrý», «Sport obektilerine qyzmet kórsetý jáne paıdalaný» jáne «Sport jáne fıtnes klýbtaryna (uıymdaryna) basshylyq etý», «Jattyqtyrýshy», «Jattyqtyrýshy-oqytýshy», «Sport tóreshisi», «Bokstan jattyqtyrýshy», «Sportshy», «Dene shynyqtyrý ádiskeri», «Nusqaýshy-sportshy» jáne «Dene tárbıesiniń jetekshisi» degen kásibı standarttar bar.
«Aıta keterligi, 5, 6 jáne 7 synyp oqýshylaryna dene shynyqtyrý jáne sport salasyndaǵy mamandandyrylǵan mektep-ınternat-kolledjderge túsý kezinde sporttyq ataqtyń bolýyna qoıylatyn talaptar alynyp tastaldy. Balalar jasóspirimder sport mektebiniń sany 2019 jyly 476 bolsa, ol bıyl 510-ǵa deıin ulǵaıtyldy. 2020 jyly QR Dene shynyqtyrý men sportty damytýdyń 2025 jylǵa deıingi tujyrymdamasy bekitildi. Oǵan qosa, QR Dene shynyqtyrý men sport salasyn damytýdyń 2023-2029 jyldarǵa arnalǵan tujyrymdamasy qabyldandy. Tórt jyl buryn Astana qalasynda Jeńil atletıka sport kesheni paıdalanýǵa berildi. Sport kesheni IAAF Halyqaralyq jeńil atletıka federatsııalary qaýymdastyǵy tarapynan sertıfıkatqa ıe boldy. Bul elordada eń joǵary deńgeıdegi jarystardy (Álem, Azııa chempıonaty jáne t.b.) ótkizýge, sapaly jattyqtyrýshylar quramy men sportshylardy daıyndaýǵa múmkindik beredi. Byltyr Almaty oblysynda olımpıadalyq daıarlyq bazasy el ıgiligine aınaldy. Nysanda bir mezette 2300 adam sporttyń 23 túrimen aınalysa alady. Sondaı-aq bıyl Atyraý oblysynda mamandandyrylǵan mektep-ınternat-kolledji ashyldy», - dep tolyqtyrdy vedomstvodan.