5 jasqa deıingi balalar arasynda kókjótel jıiledi – mınıstrlik

<p>ASTANA. KAZINFORM &ndash; Qazaqstanda kókjótel boıynsha qolaısyz epıdemıologııalyq jaǵdaı saqtalýda. Bul týraly QR Densaýlyq saqtaý mınıstrligi habarlady.&nbsp;</p>

14 jasqa deıingi balalardyń arasynda kókjóteldiń 392 jaǵdaıy tirkeldi. Onyń 90%-dan astamy 5 jasqa deıingi balalar arasynda baıqalyp otyr.

«Kókjótel jaǵdaıdarynyń kóbeıýi ujymdyq ımmýnıtettiń tómendeýimen baılanysty. Ol aýa tamshylary arqyly jótelgende, túshkirgende, naýqaspen sóıleskende taralady. Infektsııanyń kózi – ekpe almaǵan balalar. Vaktsınalaý – ınfektsııadan qorǵanýdyń jalǵyz joly. Josparly ekpeni turǵylyqty mekenjaı boıynsha emhanadan alýǵa bolady», - dep jazdy mınıstrlik.

Aldymen balada jalpy sýyq tııýdiń belgileri bolady: murynnan sý aǵady, dene qyzýy kóterilip, jótel paıda bolady. Birte-birte jótel kúsheıip, ustama tárizdi bolady jáne birneshe ret qaıtalanady. Ol asqynǵan jaǵdaıda ókpeniń qabynýy, mıdyń qabynýy sekildi saldarǵa ákeledi.

Kókjótelmen aýyratyn naýqastardy emdeýge arnalǵan arnaıy dári-dármek joq. Kókjótelge qarsy ekpe balanyń 2 aılyǵynan bastap, 3 jáne 4 aılyǵynda úsh ret salynady. Sondaı-aq, 1,5 jáne 6 jasar balalarǵa revaktsınalaý júrgiziledi.

Aıta keteıik, respýblıkada 2 jasqa deıingi balalardy ımmýndaý úshin aralas bes jáne alty komponentti vaktsınalar, 6 jastaǵy balalar úshin – Eýropada óndirilgen úsh komponentti vaktsına (Sanofı Paster S.A., Frantsııa) paıdalanylady.