5-synyp oqýshysy terrorızm aktisi týraly jalǵan habarlama taratqan
Bul týraly QR ІІM Ekstremızmge qarsy is-qımyl departamenti bastyǵynyń orynbasary, polıtsııa polkovnıgi Darhan Razýev aıtty, dep habarlaıdy QazAqparat tilshisi.
«Aqtóbe oblysynyń polıtsııa qyzmetkerleri ulttyq qaýipsizdik organdarymen birlesip, Internet arqyly «bomba týraly» elektrondy jalǵan habarlama taratqany úshin Batys Qazaqstan oblysynyń kámeletke tolmaǵan turǵynyn anyqtady. Aqmola oblysynda kámeletke tolmaǵan besinshi synyp oqýshysy ustaldy. Ol Pavlodar oblysynyń sottary ǵımaratyna jarylǵysh zattar qoıylǵanyn elektronyq poshta arqyly habarlaǵan. Qazirgi ýaqytta atalǵan ister boıynsha tergeý jalǵasýda», - dedi ol mınıstrlik baspasóz qyzmeti alańynda ótken brıfıngte.
Onyń dereginshe, Qostanaı oblysynda elimizdiń birqatar óńirindegi ártúrli nysanǵa 11 jarylǵysh zat qoıylǵany týraly Internet arqyly habarlama taratqany úshin jas jigit 1 jyl 6 aıǵa bas bostandyǵynan aıryldy.
«Jalpy, osy jylǵy 8 aıda sotqa 14 qylmystyq is joldandy. 13 adamǵa sot úkimi shyqty. Olardyń jeteýi bas bostandyǵynan aıyrý, tórt adam bas bostandyǵyn shekteý jazalaryna tartyldy. Bir azamatqa qatysty májbúrli medıtsınalyq is-shara qybyldandy», - dedi Darhan Razýev.