5 shara: Ulttyq ekonomıka mınıstri ákimdikterge jumys baǵytyn nusqady

NUR-SULTAN. QazAqparat – QR Ulttyq ekonomıka mınıstri Áset Erǵalıev ákimdikterge eldiń turaqty jáne sapaly ekonomıkalyq ósimin qamtamasyz etetin 5 baǵytty atady, dep habarlaıdy QazAqparat tilshisi.

«Barlyq kórsetkishter boıynsha oń ósý Aqmola, Almaty, Jambyl, Qostanaı oblystarynda jáne Shymkent qalalarynda baıqalýda.

6 kórsetkish boıynsha 7 óńirde ósý baıqalady. Olar Nur-Sultan qalasy, sondaı-aq Atyraý, Qaraǵandy, Qyzylorda, Pavlodar, Soltústik Qazaqstan jáne Túrkistan oblystary. 4 óńirde 5 kórsetkish boıynsha ósý tirkeldi», - dedi ol Úkimet otyrysynda.

Mınıstrdiń málimeti boıynsha, Batys Qazaqstan oblysynda 4 kórsetkish boıynsha ǵana ósý baıqalǵan.

Ol sondaı-aq, ortalyq jáne jergilikti atqarýshy organdarǵa mynadaı sharalarǵa nazar aýdarýdy usyndy:

1. Sapaly ınvestıtsııalardy tartý men súıemeldeý boıynsha memlekettik basqarýdyń barlyq satylarynda belsendi jáne maqsatty jumys júrgizý.

2. Óńdeý ónerkásibi men qurylys salasynda josparlanǵan ósý qarqynyn qamtamasyz etý.

3. Inflıatsııaǵa qarsy áreket etý jónindegi sharalar keshenin tıimdi júzege asyrylýyn erekshe baqylaý.

4. Halyqty vaktsınatsııalaý jáne kásipkerlikti qoldaý sharalaryn tıimdi júzege asyrý.

5. Shıkizattyq emes eksportqa keshendi túrde qoldaý kórsetý.

«Joǵaryda atalǵan sharalardy iske asyrý elimizdiń turaqty jáne sapaly ekonomıkalyq ósýine múmkindik beredi», - dep túıindedi mınıstr.