5 óńirinde sport nysandary memleket menshigine qaıtaryldy

<p>ASTANA. KAZINFORM &ndash; Elimizdiń birqatar óńirinde sport nysandary memleket menshigine qaıtaryldy. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.</p>

«5 óńirde sport obektilerin tıimsiz basqarý táýekelderi belgilengen. Taldaý nátıjeleri boıynsha birqatar nysan memleket menshigine qaıtaryldy», - dedi Danııar Bıgaıdarov.

Onyń dereginshe, myna nysandar memleket menshigine qaıtaryldy:

- Atyraý oblysynda «Muz saraıy» (aýdany 6 myń sharshy metr) sport nysany. Ol 2018 jyly «Baıbarys-Atyraý» hokkeı klýbynyń basqarýshysy – jeke kásipkerge negizsiz berilgen.

- Almaty qalasynda buryn memlekettik-jekeshelik áriptestik aıasynda óteýsiz negizde jeke uıymnyń basqarýynda bolǵan «Halyq Arena» jáne «Almaty Arena» qurylystary (jer ýchaskesiniń aýdany 15,9042 gektar, úı-jaılardyń aýdany 136 112,7 sharshy metr).

- Batys Qazaqstan oblysynda jeke uıymnyń senimgerlik basqarýyndaǵy fýtbol alańy bar stadıon.

- Shymkent qalasynda 7 jyl buryn 128 mln teńgege satylǵan «Muz saraıy» sport kesheniniń 67 paıyz úlesi.

- Jambyl oblysynda 2017 jyly jekeshelendirilgen jáne jaýapkershiligi shekteýli seriktestik bolyp qaıta qurylǵan «Aısha bıbi» sý polosy boıynsha klýb.

«Sondaı-aq, jalǵan qujattar negizinde sporttyq ataqtar berý faktileri anyqtaldy», - dedi ol.