5 oqýshynyń úsheýi aman qaldy: Balalar sanavıatsııamen Aqtóbege jetkiziledi

<p>Jol-kólik apatynan aman qalyp, aýrýhanaǵa túsken Janys bı aýylynyń oqýshylary Yrǵyz aýdanynan Aqtóbe qalasyna jetkiziledi. Olarǵa eki sanavıatsııa brıgadasy jiberildi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Yrǵyz aýdanyndaǵy jol-kólik apatyna baılanysty qurylǵan jumys toby búgin aýrýhanaǵa baryp, oqýshylardyń jaǵdaıyn bildi. Málim etilgendeı, naýqastardyń jaǵdaıy turaqty, ómirine qaýip tónip turǵan joq.

«Oblys ákiminiń orynbasary Bulbul Eleýsinova, Densaýlyq saqtaý basqarmasynyń basshysy Rústem Isaev, Bilim basqarmasynyń basshysy Jaıyq Sultan bastaǵan jumys toby balalarynyń amandyǵyn tilep otyrǵan ata-analarmen jolyqty. Olardyń suraýymen em-dom sharalary Aqtóbedegi oblystyq balalar aýrýhanasynda jalǵastyrylady. Zardap shekken oqýshylardyń densaýlyǵy tolyqtaı tekseriledi. Balalardyń jaǵdaıy jumys tobynyń tikeleı nazarynda bolady. Oblys ákimdigi tarapynan jan-jaqty kómek kórsetiledi. Sondaı-aq jumys tobynyń ókilderi jol apaty saldarynan kóz jumǵan bir muǵalim men eki oqýshynyń otbasyna baryp kóńil aıtty», - dep habarlady oblys ákiminiń baspasóz qyzmetinen.

Oblystyq Densaýlyq saqtaý basqarmasynyń basshysy Rústem Isaev balalardy oblys ortalyǵyna tasymaldaý úshin eki sanavıatsııa brıgadasy ushyp shyqqanyn habarlady.

Eske salsaq, keshe «Samara – Shymkent» tasjolynda jeńil jáne júk kólikteri soqtyǵysyp, olımpıadaǵa bara jatqan eki oqýshy men muǵalim kóz jumdy. Aman qalǵan úsh oqýshy túrli jaraqat alyp, aýrýhanaǵa tústi. Jol-kólik oqıǵasyna qatysty eki qylmystyq is qozǵaldy.