5 myńǵa jýyq azamat radıkaldy raılarynan qaıtty - Erjan Malǵajyuly
Eske salsaq, búgingi quryltaı barysynda Qazaqstannyń 2018-2022 jyldar kezeńi aralyǵyndaǵy bas múftıi bolyp Serikbaı qajy Orazuly saılandy.
Qazaqstan musylmandary dinı basqarmasynyń burynǵy Bas múftı Erjan qajy Malǵajyuly ózi qyzmet atqarǵan 2013-2017 jyldar aralyǵynda iske asyrylǵan jumystar jóninde esep berdi.
Erjan Malǵajyuly atap ótkendeı, ótken tórt jylda atqarylǵan jumystar nátıjesinde jat aǵymnyń arbaýynda júrgen 940 azamat hanafı mazhabyn tańdap, qatarymyzǵa qosyldy. Sondaı-aq 4967 adam radıkaldy raılarynan qaıtqan.
«Biz 2014 jyly dinı jolymyz ben baǵdarymyzdy aıqyndaıtyn, memleket tutastyǵynyń nyǵaıa túsýine septigin tıgizetin Dinı basqarmanyń 2020 jylǵa deıingi damý tujyrymdamasyn qabyldadyq. Dinı qyzmettiń sapasyn arttyrýǵa arnalǵan 4 baǵytty bekittik. Olar - kórkem ýaǵyz, jat aǵymnyń jeteginde ketken jastarmen jumys, qaıyrymdylyq is-sharalar jáne halyqty dinı saýattandyrý.
Elimizdegi musylman qaýymyn birlikke úndep, ózge din ókilderimen beıbit ómir súrýge shaqyratyn QMDB-nyń Tuǵyrnamasyn bekittik. Mazhab pen nanym-senimde jikke bólinbeýge shaqyratyn qujat óz jemisin berýde. Atalmysh Tuǵyrnama - Qazaqstan Respýblıkasy Konstıtýtsııasynyń senim bostandyǵy týraly ustanymyna, Qazaqstan Respýblıkasynyń «Dinı qyzmet jáne dinı birlestikter týraly» Zańyna, elimizdiń 2050 jylǵa deıingi Strategııalyq damý josparyna, QMDB-nyń Jarǵysyna negizdelip ázirlengen strategııalyq qujat», - dep atap ótti ol.
Sondaı-aq málim etilgendeı, meshittegi jamaǵattyń aýyzbirshiligin arttyryp, biregeı qulshylyq jasaý tártibin ornatý maqsatynda QMDB meshitteriniń Erejesi qabyldandy. 2015 jyly aqpanda elimizde tuńǵysh ret «Islam - beıbitshilik pen kelisim dini» taqyrybynda І respýblıkalyq ımamdar forýmy ótti. Shara aıasynda «Qazaqstan musylmandary dinı basqarmasynyń tuǵyrnamasy», «Din qyzmetkeriniń etıkasy», «Imamnyń tulǵalyq kelbeti», «Musylman kelbeti» atty mańyzdy qujattar qabyldandy.
«QMDB janyndaǵy Ǵulamalar keńesiniń jańa quramy jasaqtaldy. Keńeste 17 ǵalym jumys isteıdi. Onyń 9-y ǵylym doktory, qalǵany magıstrler. Biz Dinı basqarma qyzmeti aıasynda 2014-2015 jyldy «Din men dástúr» jyly dep jarııaladyq. QMDB janynan dinı bilimi tereń, tájirıbesi mol bilikti din ǵalymdarynyń basyn biriktirgen aqparattyq nasıhat toptary quryldy. Olar halyq arasynda túsindirý jumystaryn júrgizdi. Jat aǵymǵa ketken jastarymyz dástúrli hanafı mazhabyn tańdap, ortamyzǵa oralýda. 2017 jyly atqarylǵan jumystar nátıjesinde jat aǵymnyń arbaýynda júrgen 940 azamat hanafı mazhabyn tańdap, qatarymyzǵa qosyldy. 2013-2017 jyldar aralyǵynda jalpy sany 4967 adam radıkaldy raıynan qaıtty», -dedi ol.
Aıta ketsek, Qazaqstan musylmandary dinı basqarmasynyń keńsesi 2014 jyly Almatydan Astana qalasyna kóshirilgen bolatyn.