5 myńǵa jýyq áskerı qyzmetker sý tasqynymen kúresýge kómektesip jatyr

<p>ASTANA. KAZINFORM &ndash; Jergilikti bılik pen halyqqa áskerı ushqyshtar, aýmaqtyq qorǵanys brıgadalarynyń jeke quramy, óńirlik qolbasshylyqtardyń áskerı bólimderi, áskerı polıtsııa, medıtsınalyq qyzmetter men áskerı&nbsp;qatynastar&nbsp;organdarynyń&nbsp;mamandary&nbsp;ólsheýsiz&nbsp;kómek&nbsp;kórsetýde.&nbsp;</p>

Áýe qorǵanysy kúshteri bólimsheleriniń qyzmeti qutqarý qyzmetteri men volonterlik uıymdardyń jedeldigi men tıimdiligine aıtarlyqtaı áser etip jatyr. 

27 naýryz ben 13 sáýir aralyǵynda armııalyq avıatsııanyń tikushaq ekıpajdary eldi mekender men qystaqtardan 2 837 turǵyndy evakýatsııalady. Táýlik boıy áskerı-kóliktik avıatsııa ushqyshtary daǵdarys aımaqtaryna kúshter men quraldardy, mamandardy tasymaldaýmen jáne gýmanıtarlyq kómek jetkizýmen aınalysýda. Olar 18 kún ishinde 870-ke jýyq adam jáne 148 tonnadan astam júk tasymaldady. 

Qulsary qalasynan 30 shaqyrym jerde ornalasqan Jem ózeninde «Batys» ÓńQ jarý komandasy 10 jarylys jasady. Aqtaý avıabazasynyń mamandary Jaıyq ózeniniń arnasyna barlaý soqqy berý ushqyshsyz ushatyn apparattarynyń kómegimen aerobaqylaý men barlaý júrgizýdi jalǵastyrýda.

Esterińizge sala keteıik, Atyraý oblysynyń Qulsary qalasy men Jylyoı aýdanyndaǵy sý tasqynyna qarsy is-sharalarǵa «Ońtústik» óńirlik qolbasshylyǵynyń Taraz, Shymkent jáne Gvardeısk garnızondary brıgadalarynyń myńnan astam áskerı qyzmetshisi jáne Mańǵystaý oblysynyń aýmaqtyq qorǵanys brıgadasy jumyldyrylǵan.

Áskerı qyzmetshiler Jaıyq ózeniniń arnasy boıymen Mahambet kentiniń perımetri boıynsha qum salynǵan qaptardy tóseýmen aınalysýda. Jem ózeninde jaǵalaýdy nyǵaıtý jumystary júrgizilip jatyr.

Foto: QR Qorǵanys mınıstrliginen

Atyraý qalasy turǵyn alaptarynyń boljamdy sý basýyna baılanysty kúshter men quraldardy qaıta bólý júrgizildi. Jedel shtabtyń sheshimi boıynsha oblys ortalyǵyna «Ońtústik» ÓńQ-nyń 600-den astam áskerı qyzmetshisi jáne 36 birlik avtomobıl tehnıkasy kóshirildi.

Aqtóbe oblysynda Oıyl eldi mekeniniń aýdanynda áskerı ınjenerler áli de sý qatynasyn saqtap otyr. Ótken táýlikte olar 9 reıs jasap, 75 adamdy evakýatsııalady. 35 birlik avtokólik pen 3 tonna gýmanıtarlyq kómek tasymaldandy.

Batys Qazaqstan oblysynda Desanttyq-shabýyldaý áskerleriniń áskerı qyzmetshileri Aqjaıyq aýyldyq okrýgindegi Jaıyq jáne Elek ózenderiniń jaǵalaýlaryn boılaı qum salynǵan qaptardy daıyndap, tóseýge, bógetti nyǵaıtýǵa jumyldyryldy. Sonymen qatar, desantshylar Magıstralnyı, Podstepnoe, Baıqonys, Zarechensk, Býdarıno, Jańabulaq jáne Chapaev aýyldarynda bógetter salýmen aınalysýda.

Soltústik Qazaqstan oblysynyń oblys ortalyǵynda Esil ózeniniń shyǵys jaǵalaýyndaǵy aınalma jol men Podgora shaǵyn aýdanynyń erigen sýlarynan qorǵaý jumystary júrgizilýde. Áskerı qyzmetshilerdiń bir bóligi Beskól kenti aýdanyndaǵy bógetti nyǵaıtý men eldi mekenderden adamdardy evakýatsııalaý jónindegi is-sharalarǵa jumyldyrylǵan.

Aqmola oblysy Jarqaıyń aýdanynyń Zarechnyı, Dalabaı, Tasótkel jáne Tassýat aýyldarynda elordalyq brıgadanyń áskerı qyzmetshileri tirshilik etý obektilerin elektrmen qamtamasyz etý jumystaryn jalǵastyrýda.

Sondaı-aq Qorǵanys mınıstrligi Jambyl oblysynan Kókshetaý qalasyna eki motopompany tasymaldaýdy uıymdastyrdy. Sý basý aýdandarynda epızootııalyq is-sharalardy ótkizýge Qarýly kúshterdiń Tyl bastyǵy basqarmasynyń veterınarııalyq-sanıtarııalyq baqylaý mamandary qosylatyn bolady.

Esterińizge sala keteıik, 27 naýryz ben 13 sáýir aralyǵynda qarýly kúshterden sý tasqynyna qarsy is-sharalarǵa barlyǵy 4 959 adam jumyldyryldy. Áskerı qyzmetshilerdiń kúshimen shamamen 450 myń qap qum daıyndalyp, tóseldi.