5 maýsymda «Bolashaq» stıpendııasyna ótinim qabyldaý bastalady

ASTANA. QazAqparat - 5 maýsymda «Bolashaq» baǵdarlamasy aıasynda qujat qabyldaýdyń úshinshi legi bastalady. Ótinimder bıylǵy jylǵy 7 shildege deıin eGov.kz memlekettik qyzmetter portaly arqyly qabyldanady, dep habarlaıdy Halyqaralyq baǵdarlamalar ortalyǵynyń baspasóz qyzmeti.

Jyldyń sońyna deıin ótinim qabyldaýdyń taǵy bir legi ótetin bolady: 17 shilde men 15 qyrkúıek aralyǵynda.

2023 jyly «Bolashaq» baǵdarlamasy aıasynda 555 stıpendııa bólindi. Onyń ishinde 395 stıpendııa magıstratýra jáne rezıdentýra, 50 stıpendııa doktorantýra, 110 stıpendııa taǵylymdama baǵdarlamalary boıynsha úlestirilgen. Basym mamandyqtar tizimi 262 mamandyqty kózdeıdi.

«Bıyl «Bolashaq» stıpendııasy aıasynda úmitkerlerdi irikteý qaǵıdalary jetildirildi. Endi konkýrsqa sheteldik joǵary oqý orny nemese uıymnan akademııalyq oqýǵa granty bar úmitkerler de qatysa alady. Bul rette, «Bolashaq» baǵdarlamasy turý, tamaqtaný, medıtsınalyq saqtandyrý, ushý, vızalyq alymdar, oqý materıaldaryn satyp alý shyǵyndaryn óteıtin bolady. Sondaı-aq, eńbekpen óteý merzimi bir jylǵa qysqarady», - dep atap ótti «Halyqaralyq baǵdarlamalar ortalyǵy» AQ Basqarma tóraǵasy Oljas Sákenov.

«Bolashaq» stıpendııasyn taǵaıyndaý konkýrsyna jeńildigi bar úmitkerlerdi qospaǵanda, jetekshi sheteldik joǵary oqý ornynan shartsyz shaqyrýy bar úmitkerler ǵana qatysa alady.

Bıylǵy jyldyń taǵy bir jańalyǵy - «Bolashaq» baǵdarlamasynyń konkýrstyq irikteý erejeleri jetildirildi. Endi kandıdattar ótinim bergen kezde shet tilinen emtıhan tapsyrǵany týraly sertıfıkat usynady. Mysalǵa, aǵylshyn tilinde magıstratýraǵa túsýshiler nátıjesi keminde 9.0 – dan 6.0 IELTS, PBT 677- den 498, IBT 120- dan 60 TOEFL sertıfıkattaryn, taǵylymdamadan ótýshiler - IELTS 5.0, PBT-417, IBT-35 TOEFL, DET 75 sertıfıkattaryn usynýy tıis.

Esterińizge sala keteıik, Memleket basshysynyń «Bolashaq» baǵdarlamasyn qaıta baǵdarlaý jónindegi tapsyrmasy boıynsha ınjenerlik-tehnıkalyq kadrlardy daıarlaýǵa basymdyq beriledi. Úmitkerlerdi qoldaý úshin «Injenerlik-tehnıkalyq qyzmetkerler» jańa jeńildik sanaty engizildi. Sonymen qatar Halyqaralyq baǵdarlamalar ortalyǵynyń bastamasymen medıtsınalyq qyzmetkerlerdi irikteý qaǵıdalary jetildirildi.

Atalǵan ózgertýlerdiń arqasynda qazaqstandyq dárigerler men tehnıkalyq qyzmetkerler merzimi 12 aıǵa deıingi tegin tildik daıyndyqtan óte alady.