5 qańtar. Jylnama
ESTE QALAR OQIǴALAR
1993 jyly «Ulttyq test ortalyǵy» respýblıkalyq memlekettik qazynalyq kásiporny quryldy. UTO-nyń basty qyzmeti Qazaqstannyń bilim berý júıesine monıtorıng jasaý jáne barlyq túrdegi syrtqy emtıhandardy uıymdastyrý jáne ótkizý, test tapsyrmalarynyń bazasyn qurastyrý boldy.
2006 jyly Almatydaǵy «Óner» baspasy kórnekti qoǵam jáne mádenıet qaıratkeri Ózbekáli Jánibekovtiń (1931-1998) «Qazaq kıimi» atty kitabyn basyp shyǵardy.
2009 jyly respýblıkamyzda bıometrııalyq pasport berý bastaldy. Jańa tólqujattyń sońǵy betinde kelesi málimetterdi qamtıtyn kózge kórinbeıtin elektrondy chıp ornatylǵan: famılııa, aty, ákesiniń aty, jynysy, týǵan jeri men týǵan kúni, azamattyǵy, tólqujattyń nómiri, qujattyń berilgen kúni jáne paıdalaný merzimi, jeke ıdentıfıkatsııalyq nómiri, tsıfrlyq fotosýreti jáne ıesiniń qoly.
2010 jyly QR Syrtqy ister mınıstrliginde Qazaqstannyń 2010 jylǵy EQYU-ǵa tóraǵalyǵy qyzmetin nasıhattaýdy qamtamasyz etý maqsatynda ázirlengen resmı veb-saıttyń (www.osce2010.kz) tanystyrylymy boldy. Saıtta barynsha keń siltemeleri bar búgingi kúnniń navıgatsııasy jáne tolyqmátindi izdeý júıesi, sondaı-aq saıttyń kartasy ornalastyrylǵan.
2012 jyly Almatyda D.Qonaevtyń 100 jyldyǵyna arnalǵan fotoalbom jaryq kórdi. Alǵash ret onyń otbasylyq muraǵatynan týystarymen jáne demalý kezinde túsirilgen fotosýretteri, sonymen qatar D.Qonaev turǵan páterdiń fotosýretteri kórsetilgen. Fotoalbom betterinde kórsetilgen ordender men marapattar, sheteldik memleket basshylarynyń syılyqtary, D.Qonaevtyń atys jáne sýyq qarý jınaǵy men onyń biregeı ottyq kollektsııasy úlken qyzyǵýshylyq týdyrdy.
2017 jyly qazaqstandyq kınoteatrlarda jazýshy Іlııas Esenberlınniń «Kóshpendiler» trılogııasy boıynsha túsirilgen «Qazaq eli» jobasynyń alǵashqy bólimi - «Almas qylysh» fılmi kórsetile bastady. Fılm stsenarııin jazǵan - Smaǵul Elýbaı. Rejısseri - Rústem Ábdirash. Tarıhı jobanyń avtory - QR Prezıdenti N.Nazarbaev. Fılm QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ «Centaurus Rustem Abdrashev production» JShS-nyń qatysýymen túsirilgen.
2017 jyly The New York Times basylymy 2017 jyly álemde adamdar barýy tıis 52 oryndy jarııalady. Amerıkalyq gazettiń nusqasy boıynsha, Qazaqstan bul tizimde 26-orynda.
2019 jyly Astanada kardıohırýrgtar júrekke biregeı ota jasady. Naýqas – júreginde aqaýy bar 74 jastaǵy Shyǵys Qazaqstan oblysynyń turǵyny. Dárigerler aortaldy klapandy transkateterlik ımplantatsııalaýdy jáne shaǵyn ınvazıvti aortokoronarlyq shýnttaýdy júrgizýdi sheshken. Júrekke jasalatyn gıbrıdti otanyń bul túri medıtsınalyq tilde dál osylaı aıtylady. Mundaı otanyń bar bolǵany 7-eýi ótkizilgen. Qazaqstandyq kardıohırýrgtar segizinshisin jasady.
2024 jyly Tashkentte ótken kezdesýde Qazaqstannyń Saýda jáne ıntegratsııa mınıstri Arman Shaqqalıev pen Ózbekstannyń Investıtsııalar, ındýstrııa jáne saýda mınıstri Lazız Kýdratov ózara taýar aınalymyn arttyrý máselelerin talqylady. Memleket basshylary baýyrlas elder arasyndaǵy taýar aınalymyn eki ese ulǵaıtyp, 10 mlrd dollarǵa jetkizý týraly aýqymdy mindet qoıdy. Birlesip qurylǵan «ÓzQazTreıd» kompanııasy arqyly qarym-qatynasty jandandyrý týraly kelisimge qol jetkizildi. Bul, eń aldymen, Ózbekstannan Qazaqstanǵa jemis-jıdek pen kókónis jetkizý, toqyma ónimderin jetkizý. Keri baǵytta maı ónimderi men qara metallýrgııa buıymdaryn jetkizý ulǵaıady. Taraptar sonymen qatar ónimdi sertıfıkattaý, ınspektsııalaý, zertteý nátıjelerin ózara taný máselelerin talqylady.