5-6 jyl buryn salynǵan mektepterdiń ózi apatty jaǵdaıda tur – Ashat Aımaǵambetov

NUR-SULTAN. QazAqparat – Keıbir oblystarda 5-6 jyl buryn salynǵan mektepterdiń ózi apatty jaǵdaıda turǵanyna kózim jetti. Búgin apparat jınalysyn ótkizgen Oqý-aǵartý mınıstri Ashat Aımaǵambetov osylaı dep málim etti, dep habarlaıdy QazAqparat tilshisi.

«Mektep ǵımarattarynyń qaýipsizdik jaǵdaıyn tekserý qajet. Ókinishke qaraı, sońǵy jyldary mektep ǵımaratynyń qaýipsizdigine baılanysty keleńsiz jaǵdaılar oryn alýda. Bul óte qaýipti. Amandyq bolyp, barlyq jaǵdaılarda balalarymyz zardap shekken joq. Osyndaı jaǵdaılardyń jıilep ketýine baılanysty Úkimet otyrysynda oblys ákimderine mektepterdiń tehnıkalyq jaǵdaıyn tekserý boıynsha usynys aıttym. Árıne, oǵan qosymsha qarajat kerek. Osy jýyrda ǵana birneshe oblysta boldym. Onda 5-6 jyl buryn salynǵan mektepterdiń ózi apatty jaǵdaıda turǵanyna kózim jetti. Sondyqtan oǵan tıisti tekserý júrgizý kerek. Bul tapsyrmany bilim basqarmalary men bólimderine júkteımin. Barlyq mekteptiń ǵımaraty balalar úshin qaýipsiz bolýy qajet. Men muny buryn da usynǵanmyn. Biraq áli kúnge deıin óńirlerde bul jumys qarqyndy júrip jatyr dep aıta almaımyn», - dedi mınıstr.

Eske salaıyq, búgin Shyǵys Qazaqstan oblysy Rıdder qalasynda mektep ishi tútindep, 500-ge jýyq oqýshy evakýatsııalanǵandy. Anyqtalǵandaı, 2-qabatta ornalasqan as úı bólmesindegi pesh ústinde maı qalyp qoıyp, sodan tútin shyqqan. Oqıǵa kezinde zardap shekkender joq.