«5:32»: Salem social media aıyptaýlarǵa jaýap berdi
«Ótken táýlikte birneshe BAQ Salem komandasy men Álisher Ýtev bastaǵan serıal óndirýshileri jáne stsenarıı avtorlary ıntellektýaldyq menshik nysanyn urlady degen aıyptaýlar jarııalaǵanyn baıqadyq. Osy oraıda, kelesideı málimdemeler jasaımyz: Salem social media men Álisher Ýtev dál qazirgi sátte eshqandaı sotqa deıingi narazylyq alǵan joq; Asqar Jaldınovtyń tarapyna ıntellektýaldyq quqyq buzýshylyq joq, kitap ta, serıal da elimizdiń krımınaldy tarıhyna baılanysty oqıǵalar men faktilerdi sýrettegen. Oqıǵalar men faktiler týraly aqparat avtorlyq quqyqpen qorǵalmaǵan. Oqıǵalar men faktilerdiń shyǵarmashylyq ınterpretatsııasyn kez kelgen adam jasaı alady», - dep jazylǵan kompanııa hatynda.
Sonymen birge, Salem kompanııasy kerisinshe, óziniń aýdıovızýaldy quqyǵy buzylǵanyn málimdedi. «5:32» serıalynyń vıdeofragmentteri kitaptyń jarnamasynda qoldanylǵanyn alǵa tartady.
«Urlyqqa qatysty aıyptaýlar tutas komandanyń, jobany óndirýshilerdiń jumysyn joqqa shyǵarady, kompanııanyń iskerlik bedeline jáne veb-serıal avtorlarynyń ary men abyroıyna nuqsan keltiredi.
«5:32» serıalynyń stsenarıı negizinde jatqan oqıǵalar shynaıy ómirden alynǵan, shynaıy faktilerge qurylǵan. Bul qoldanystaǵy hronıkalar, olardy ár túrli qaınarkózder ashyq qoldanady jáne ınterpretatsııa men kórkem shyǵarma óndirisinde kez kelgen adam qoldana alady.
Salem óz iskerlik bedelin jáne ıntellektýaldy menshikke qatysty quqyǵyn qorǵaýǵa múddeli», - dep habarlady Salem social media.
Buǵan deıin «Protokoldan tys. Qazaqstandaǵy atyshýly qylmystar qupııasy» kitabynyń avtory Asqar Jaldınov «5:32» serıalyn túsirgenderdi sotqa bergenin habarlaǵan edi.
Aıta keteıik, «5:32» serıalynda qatygez adam óltirý qylmysyn ashyp, manıaktardy ustaǵan qazaqstandyq polıtseıler týraly baıandalady. Serıal 1990 jyldary bolǵan shynaıy oqıǵalarǵa negizdelgen. Basty rólderde Ábilmansur Serikov pen Marat Ámiraev oınaıdy.