48 mln teńge alǵan — Poıyz qyzmetkerlerin bopsalap kelgen «bloger» ustaldy

<p>Kóliktegi polıtsııa departamentiniń uıymdasqan qylmysqa qarsy kúres basqarmasynyń qyzmetkerleri júrgizgen jedel-izdestirý is-sharalarynyń nátıjesinde buryn alaıaqtyq jasaǵany úshin birneshe ret sottalǵan Semeı turǵyny ustaldy, &mdash; dep habarlaıdy Polisia.kz.</p>

Ol birneshe jyl boıy ózin «bloger» retinde tanystyryp, Semeı arqyly ishki jáne halyqaralyq baǵyttar boıynsha júretin jolaýshylar poıyzynyń qyzmetkerlerin masqaralaıtyn beınematerıaldardy jarııalaımyn dep qorqytyp, aqsha bopsalap kelgen.

Kúdikti jolaýshy sııaqty poıyzǵa otyryp, óziniń jeke paıdasy úshin jolaýshylar tasymaly salasyndaǵy buzýshylyqtardy telefonyna túsirip, aqsha bopsalaýǵa paıdalanǵan.

— Bul qylmys uzaq ýaqyt boıy polıtsııa qyzmetkerleriniń nazarynan tys qaldy, sebebi jábirlenýshiler qorqyp, quqyq qorǵaý organdaryna júginbegen. Uıymdasqan qylmysqa qarsy kúres basqarmasyna «sıgnaldar» túse bastaǵannan keıin ǵana kúdiktiniń zańsyz áreketterine tosqaýyl qoıyldy. Qaskóı ustalyp, sot sanktsııasymen qamaýǵa alyndy, — dedi QR ІІM uıymdasqan qylmysqa qarsy kúres departamentiniń ókili Qýandyq Alpys.

Qazirgi ýaqytta qylmystyq is boıynsha jolaýshylar poıyzdarynyń 60-tan astam qyzmetkeri jábirlenýshi retinde tanyldy. Aldyn ala tergeý nátıjesi boıynsha ustalǵan adamnyń bank shottaryna 2021 jyldan beri 48 mln teńgeden astam qarajat túskeni anyqtaldy.

Qylmystyq is sotqa jiberildi.