47 jylyn jol salasyna arnaǵan Gúldaraı Muhamadıeva
«Omby-Maıqapshaıǵaı» avtojolynyń 942-1103 shaqyrym ýchaskesindegi «Qalbataý-Buǵaz» arqyly ótetin júrgizýshiler men jolaýshylarǵa Gúldaraı hanym jaqsy tanys. Sebebi, alty aı qystaǵy burqasynda jol ashatyn da, ala jazdaı joldy kútip-ustaıtyn da osy kisi.
Eńbek jolynda myńdaǵan shaqyrym joldyń jaǵdaıyn tıisti deńgeıde saqtap, myńdaǵan adamdy qar qursaýynan qutqarǵan. Kóliktiń kez kelgen túri: kamaz deısiz be, shnekoroter, avtogreıder deısiz be, barlyq tehnıkany erkin meńgergen.
Jasym keldi demeı, búginge deıin jolda bir adamdaı eńbek etip, kólik tizgindeıdi. Bir qyzyǵy, osy 47 jyldyń ishinde jol erejesin múldem buzbaǵan, birde-bir aıyppul arqalamaǵan.
Kópbalaly otbasynda bes uldan keıin dúnıe esigin ashqan ol er minezdi bolyp ósken. Kishkentaıynan ákesiniń qasynda júrip, tehnıkany meńgergen. Tehnıkaǵa degen sol balalyq mahabbat kúni búginge deıin kúshin joımaǵan.
Keıipkerimiz jolshy bolý áıel adam úshin ońaı emes ekenin aıtady. Óıtkeni, úıde – aıaýly ana, al, túzde - bilikti maman bolý áste jeńil emes. Sóıtse de, qaısar jan Gúldaraı Muhamedıeva jumysymen qatar balalaryn jetkizip, baý-baqshasyn egip, mal ustap ta úlgerýde.
Búginde úsh qyzǵaldaq qyzy boıjetip, el damýy úshin eńbek etip júr. Kishi qyzy – temirjolshy. Súıikti nemereleriniń asyl ájesi áli de qudaı kúsh-qýat berse, qaýipsiz jol qozǵalysyn uıymdastyrý úshin aıanbaı eńbek ete beremin dep otyr.