43 jastaǵy er adamnyń kóliginen 3 qap esirtki tabyldy - Jambyl oblysy

TARAZ. QazAqparat – Jambylda qyzmettik ıttiń kómegimen er adamnyń kóliginen 50 keli esirtki tabyldy, dep habarlaıdy QazAqparat tilshisi.

«Qarasora-2021» respýblıkalyq jedel aldyn alý is-sharasyn ótkizý barysynda Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń qyzmetkerleri «Shý- Qordaı» avtojolynda 43 jastaǵy er adamnyń basqarýyndaǵy Nissan markaly avtokólikti toqtatty.

Polıtsııa qyzmetkerleri «Teıa» atty qyzmettik ıttiń kómegimen kóliktiń júk bóliminen jalpy salmaǵy 50 keliden asatyn keptirilgen marıhýana salynǵan úsh qapty taýyp, tárkiledi.

«Ustalǵan azamat kinásin tolyq moıyndady. Qordaı aýdanynyń ýaqytsha ustaý ızolıatoryna qamaqqa alyndy. Qazaqstan Respýblıkasy Qylmystyq kodeksiniń 297-baby 3-bóligi boıynsha (Asa iri mólsherde esirtki zattaryn ótkizý maqsatynda zańsyz saqtaý boıynsha múlki tárkilenip, on jyldan on bes jylǵa deıingi merzimge bas bostandyǵynan aıyrýǵa jazalanady) sotqa deıingi tergeý amaldary bastaldy», – dep habarlady Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń bastyǵy Asqar Jumabekov.