42500 teńgeniń 20 myńyn qaıtarý qajet: Internette jańa feık-aqparat tarady

NUR-SULTAN. qazAqparat - Qazaqstandyq Instagram-akkaýnttardyń birinde tótenshe jaǵdaı kezinde 42 500 teńge alǵan «jumyssyz» sanatyndaǵy qazaqstandyqtar endi 20 000 teńgeni memleketke qaıtarýǵa mindetti ekendigi týraly aqparat talqylanýda, dep habarlaıdy QazAqparat.

Stopfake.kz saıty QR Eńbek jáne halyqty áleýmettik qorǵaý mınıstrligine silteme jasap habarlaýynsha, bul aqparat – jalǵan.

42 500 teńge mólsherindegi áleýmettik tólem Memlekettik áleýmettik saqtandyrý qorynyń (MÁSQ) qarajaty esebinen tólendi jáne ol karantındik shekteýler men tótenshe jaǵdaı rejımine baılanysty jumysynan aıyrylǵan jumys isteıtin azamattarǵa berildi.

«Eger azamat jumyssyz bolsa, ol Qazaqstan Respýblıkasynyń barlyq aýmaǵynda shekteýlerdiń engizilýine baılanysty tabysynan aıyrylýy múmkin emes edi. Tıisinshe, ol 42 500 teńge almaýǵa tıis jáne ózin-ózi jumyspen qamtýshy retinde tólem alýǵa ótinish bermeýi kerek edi, óıtkeni ol bul sanatqa jatpaıdy. Degenmen, qazir MÁSQ 42 500 teńge alǵan jumyssyzdardan 20 000 teńge kólemindegi qarajatty qaıtarýdy talap etip jatpaǵanyn atap ótkenimiz jón, – dep habarlady QR Eńbek jáne halyqty áleýmettik qorǵaý mınıstrliginen.

Aıta keteıik, 42500 teńge kólemindegi áleýmettik tólemdi qaıtarý qajettigi týraly aqparat ınternette buǵan deıin de taraǵan bolatyn. Eńbek jáne halyqty áleýmettik qorǵaý mınıstrligi bul aqparattardyń shynaıylyǵyn joqqa shyǵardy.