42 500 teńgeni qalaı qaıtarýǵa bolady

NUR-SULTAN. QazAqparat – QR Eńbek jáne halyqty áleýmettik qorǵaý mınıstrligi 42 500 teńgeni qaıtarýǵa nıetti adamdar áleýmettik tólemdi bankterdiń smartfondardaǵy qosymshasy arqyly qaıtara alatynyn málim etti, dep habarlaıdy QazAqparat.

«42 500 teńge» áleýmettik tólemi boıynsha barlyq taǵaıyndaýlardyń negizi tótenshe jaǵdaı tártibi aıaqtalǵannan keıin bekitilgen zań júzinde qaıta tekseriledi. Ár ótinimge qatysty usynylǵan derekterdiń shynaıylyǵyna jaýapkershilik júktelgen, onyń ishinde, álbette basty sebep – tótenshe jaǵdaı kezindegi shekteýler saldarynan tabystan aıyrylý. Osylaısha, el azamaty «42 500 teńge» tólemge ótinim bere otyryp, tótenshe jaǵdaı ýaqytyna deıin kirisi bolǵanyna jáne ony joǵaltqanyna kepildik beretinin rastaıdy. Áleýmettik tólemderdi zańsyz alǵan adamdardyń jaýapkershilikke tartylýy olardyń jasaǵan zańsyz áreketine baılanysty bolady. Áleýmettik tólem alýshylardyń zańsyz is-qımyly Qylmystyq kodekstiń aıasynda qarastyrylady (190, 195 baptar)»,- delingen mınıstrlik habarlamasynda.

Eger ótinish berýshi qatelesip, áleýmettik tólem alǵan bolsa, biraq bul qarajatty qaıtarý qajet dep sanasa, onda 42 500 teńgeni kelesi shotqa jibere alady:

Alýshynyń ataýy: «Azamattarǵa arnalǵan úkimet» memlekettik korporatsııasy» KeAQ

BSN: 160440007161

BSK: GCVPKZ2A

JSK: KZ67009SS00368609110

TTK: 049

Halyq bank pen Kaspıı bankte shottary bar azamattar, «Áleýmettik tólemderdi qaıtarý» tetigin tańdaı otyryp, 42 500 teńgeni bankterdiń uıaly qosymshasynan qaıtara alady.

Budan buryn habarlanǵandaı, tótenshe jaǵdaı kezinde tabysynan aıyrylýyna baılanysty 3 mıllıonnan astam adamǵa Memlekettik áleýmettik saqtandyrý qorynan tólemder taǵaıyndaldy.