42 500: Mınıstr erejeniń birneshe ret ózgerý sebebin túsindirdi

NUR-SULTAN. QazAqparat - Ortalyq kommýnıkatsııalar qyzmetindegi brıfıngide QR Eńbek jáne halyqty áleýmettik qorǵaý mınıstri Birjan Nurymbetov 42 500 teńge áleýmettik tólem erejesiniń birneshe ret ózgerý sebebin túsindirdi, dep habarlaıdy QazAqparat tilshisi.

«Kóptegen kisiler synaý barysynda «osy mınıstrlik erejeni ylǵı ózgerte beredi, halyqty jańylystyrady. Birese alady, birese almaıtyn bolyp shyǵady» deıdi. Ol durys emes. Sizderge túsindirip bereıin. 23 naýryz kúni Prezıdentimiz jańa tólem engiziletindigin habarlaǵannan keıin úsh kúnniń ishinde biz elimizde jańa, buryn bolmaǵan áleýmettik tólemen engi z dik. Ótinish berý, taǵaıyndaý joldaryn rettedik. Odan keıin suraqtar týyndap jatty, halyqtyń ótinishteri, talaptary, aryzdary tústi. Sondyqtan biz halyqtyń ótinishterin eskerip, tólemdi jeńildetý úshin ǵana ózgerister engizdik», - dedi mınıstr.

Mysaly, onyń túsindirýinshe, buryn 42 500 teńge áleýmettik tólemdi tek jeke kásipkerlikter ǵana ala alatyn. Al 29 naýryzda engizilgen ózgeristerge sáıkes, bul qatarǵa azamattyq-quqyqtyq sıpatta jumys istep júrgen frılanserler, karantındegi qalalardyń iri kásiporyndardyń aqysyz demalysqa jiberilgen jumysshylary qosyldy. Sońǵy 12 aıdaǵy áleýmettik tólemder 3 retten 1 retke qysqartyldy.

«Kelesi ózgeris 3 sáýirde boldy. Kommertsııalyq emes uıymdar tarapy da qarjylyq múmkindikteriniń joqtyǵyna baılanysty qyzmetkerlerin aqysyz demalysqa jibergendikterin aıtty. Sondyqtan osy uıymdardy qostyq. 31 naýryzda Prezıdentimiz «resmı jumys istegendermen qatar beıresmı jumys istegen azamattar bir ret biryńǵaı jıyntyq tólem tólep, mártebesin anyqtap, áleýmettik tólem alsyn» dep tapsyrma berdi. 3 sáýirde sony engizdik», - dedi Birjan Nurymbetov.

Mınıstr 15 sáýirdegi sońǵy ózgeristerge de toqtaldy.

«Kóptegen adamnyń bankterde esepshottary joq eken. Sóıtip, adamdar bankke aǵyldy. Sondyqtan biz jedel túrde sheshim qabyldap, ótinishti esepshottardy kórsetpeı berý múmkindigin jasadyq. Tólemdi taǵaıyndap qoıamyz, 30 kúnge deıin esepshot ashqandaryńyzdy kútemiz. Al muny erejege ashyp jazýymyz kerek. Sebebi taǵaıyndaıtyn mekemege esepshotsyz taǵaıyndaý quqyǵyn berýimiz qajet. Buǵan qosa, biraz azamattyń jeke kýáliginiń merzimi ótip ketken eken. 42 500 teńge tóleýge kedergi bolmasyn dep onyń da sheshimin qabyldadyq. Ózgeristerdi erejege qostyq», - dedi ol.