400 myńnan astam bala mektepke daıyndalý úshin materıaldyq kómek alady

ASTANA. QazAqparat - Halyqtyń áleýmettik osal toptarynan 400 myńnan astam bala mektep formasymen, mektepke qajet kerek-jaraqtarymen qamtamasyz etýge materıaldyq kómekpen qamtylatyn bolady, dep habarlaıdy QR Oqý-aǵartý mınıstriligiń baspasóz qyzmeti.

Bıyl ár bilim alýshyǵa kıim, oqý quraldaryn satyp alýǵa arnalǵan qarajattyń eń tómengi mólsheri– 40 567 teńge. Barlyq aqsha aýdarymdary ata-analardyń kartochkalyq shottary arqyly júzege asyrylady.

«Qarajat ata-analarǵa balalarmen birge mektep formasyn, aıaq kıimdi, keńse taýarlaryn ózderi tańdap alý úshin beriledi. Qabyldanǵan ózgerister ata - analar men balalarǵa jetkizýshilerdi óz betinshe tańdaýǵa múmkindik beredi», - deıdi Balalardyń quqyqtaryn qorǵaý komıteti tóraǵasynyń orynbasary Joldas Batyrhan.
Muqtaj otbasylarǵa materıaldyq kómek kórsetý jáne balalardy 100% qamtamasyz etý úshin jalpyǵa birdeı mindetti orta bilim berý qory jumys isteıdi. «Jalpyǵa birdeı oqytý» qory ataýly áleýmettik kómek alatyn otbasylardan shyqqan balalarǵa, sondaı-aq jan basyna shaqqandaǵy ortasha tabysy eń tómengi kúnkóris deńgeıinen tómen otbasylardan shyqqan balalarǵa materıaldyq kómek kórsetedi.
Jańa oqý jyly qarsańynda jetim jáne ata-anasynyń qamqorlyǵynsyz qalǵan balalar, tótenshe jaǵdaıǵa tap bolǵan oqýshylar qarjylaı kómek alady.
Onyń ishinde Abaı oblysyndaǵy apattan qaza tapqan ormanshylardyń balalary bar.
Esterińizge sala keteıik, ótken jyly mektep jıyntyǵyn satyp alý somasy 17 myń teńgeden bastalǵan bolatyn.