400 myńǵa jýyq kópbalaly otbasy memlekettik járdemaqy alady
12:35, 09 Sáýir 2020
NUR-SULTAN. QazAqparat – Bıylǵy 15 sáýirge deıin 396,6 myń otbasy kópbalaly otbasylarǵa beriletin memlekettik járdemaqy alady. Bul maqsattarǵa respýblıkalyq bıýdjetten 19 mlrd teńge kózdelgen, dep habarlaıdy QazAqparat.
«4 jáne odan kóp birge turatyn kámeletke tolmaǵan nemese kúndizgi bólimde oqıtyn 23 jasqa deıingi stýdent balalary bar kópbalaly otbasylar tabysyna qaramastan memlekettik járdemaqyǵa úmitker bola alady. Tólem mólsheri balalardyń sanyna baılanysty 42,5 myń teńgeden (4 bala) 74,4 myń teńgege (7 jáne odan astam) deıin saralanǵan. Atalǵan memlekettik járdemaqyny engizý ataýly áleýmettik kómek kórsetýdiń jańa tetikterimen qarastyrylǵan tabysy az jáne kópbalaly otbasylardy qoldaýdyń negizgi úsh baǵytynyń biri bolyp sanalady», - delingen Eńbek jáne halyqty áleýmettik qorǵaý mınıstrligi habarlamasynda.
Sonymen qatar, áleýmettik tólemder men zeınetaqylardyń barlyq túrleri belgilengen kestege sáıkes tolyq kólemde iske asyrylatyn bolady.