400 myńdaı adam býkmekerler men kazınolardyń turaqty klıentine aınalǵan — depýtat
«Máselen, byltyr býkmekerlik keńselerdiń jyldyq aınalymy beıresmı aqparattar boıynsha 1 trıllıon teńgege jetken. Qazir qumar oıyndary jyljymaıtyn múlik naryǵyn basyp ozyp, aldyńǵy orynǵa shyqqan. Sondyqtan osynaý zań jobasy óte ózekti ári qoǵam úshin mańyzdy ekeni anyq. Bul máseleni el Prezıdenti Qasym-Jomart Toqaevtyń ózi birneshe ret kóterip, naqty tapsyrma berdi. Qaýipsizdik keńesiniń otyrysynda da, Ulttyq Quryltaıda birneshe ret erekshe toqtalǵanyn jaqsy bilesizder. Shyny kerek, qazirgi tańda Qazaqstanda oıynqumarlyq indetteı órship, el qaýipsizdigine qater tóndire bastady. Onyń basty sebebi — qumar oıyndarynyń jurtshylyqqa ońaı qoljetimdi bolýy jáne ony uıymdastyrýshylardyń ınternettegi saıttarynyń keńinen taralýy. Derekterge júginsek, keıingi eki jarym jylda elimizdiń árbir besinshi adamy oıyn oınaıdy eken nemese qumar oıyndaryna qandaı da bir qatysy bar. 400 myńdaı adam oıynǵa salynyp, býkmekerlik keńseler men kazınolardyń turaqty klıentine aınalǵan», — dedi Májilis depýtaty Elnur Beısenbaev.
Onyń aıtýynsha, ajyrasýlardyń 40 paıyzyna osy lýdomanııa tikeleı sebep boldy. Turmystyq zorlyq-zombylyqqa baratyndardyń deni — osy qumar oıynǵa shaldyqqandar.
«Máselen, 2022 jyly elimizde 3 myń 676 adam ózine qol jumsap, olardyń árbir besinshisiniń sebebi — lýdomanııa. Ókinishke qaraı, bul dert qazir áskerde de keń etek alǵan. Buryn sarbazdar arasynda álimjettik bar bolǵanymen, sýıtsıd óte sırek kezdesetin. Qazir álimjettik azaıǵanymen, sarbazdardyń ózine qol jumsaýy jıilep ketti. Olardyń kóbi qumar oıynnyń shyrmaýynan shyǵa almaı, osyndaı jantúrshigerlik qadamǵa baryp jatyr. Sonymen qatar qylmys jasaıtyndardyń 20 paıyzy lýdomandar ekeni belgili boldy. Olar báske tigetin aqsha tabý úshin aldymen qaryz alady, sodan soń urlyq, tonaý sekildi qylmystarǵa barady eken. Osylaısha, lýdomanııa 21 ǵasyr dertine aınalyp otyr. Tipti mektep oqýshylary da oıynǵa qatysyp, bás tige bastady. Olardyń eresek týystarynyń atynan tirkelip, oınaý faktileri jıilep ketti. Máselen, shamamen elimizdegi árbir besinshi jas býkmekerlik keńselerde bás tigedi. Bul degenińiz, bir mıllıonnan astam jas keminde birneshe ret qumar oıynǵa bás tikken degen sóz», — dedi depýtat.
Onyń sózine qaraǵanda, buryn oıyn avtomattarymen oınasa, endi onyń barlyǵy onlaınǵa kóshti. Bala kezinen qumar oıynyna úıir bolǵan balalar óse kele oǵan birjola táýeldi bolyp jatyr. Onyń sońy qaryzǵa kirýge, sýıtsıdke, ajyrasýǵa jáne maskúnemdikke ákeledi. Aqyr sońynda bul jeke adamnyń ǵana emes, otbasynyń, búkil qoǵamnyń problemasyna aınaldy.