400 keli ýyldyryq pen totyqusty shekaradan zańsyz alyp ótpek bolǵandar ustaldy

NUR-SULTAN. QazAqparat - Ótken táýlikte shekarashylar 400 kg qara ýyldyryq, deklartsııalanbaǵan valıýta jáne totyqusty shekaradan alyp ótpek bolǵandardyń jolyn kesti. BUl jóninde Ulttyq qaýipsizdik komıtetiniń shekara qyzmetine silteme jasap QazAqparat habarlaıdy.

Búgin tańǵy 6 saǵat shamasynda «Jaısan» ótkizý pýnktinde shekaralyq baqylaý barysynda 1990 jylǵy týǵan QR azamaty ustaldy. Ol Qazaqstan Respýblıkasynan Reseı Federatsııasyna jalpy salmaǵy 400 kg qara ýyldyryq pen bekire balyǵyn zańsyz alyp ótpek bolǵan. Ustalǵan taýardyń aldyn ala boljamdy baǵasy - 156 mln teńge.

«Quqyqbuzýshy baǵaly júkti jemis-jıdek retinde banannyń qorabyna salyp, qapshyqtaǵy kúrishtiń, meıiz ben jańǵaqtyń astyna jasyryp alyp ótýge tyrysqan. Alaıda, qyraǵy shekarashylardy aldaı almady. Ustalǵan azamat júgimen birge Aqtóbe oblysy boıynsha ekonomıkalyq tergeý departamentine tapsyryldy» delingen habarlamada.

Qorǵas shekarashylary ótken táýlikte «Qorǵas» ShYHO arqyly Qazaqstan Respýblıkasynan jalpy somasy 9 154 000 teńge valıýtany zańsyz alyp ótpek bolǵan eki oqıǵanyń kýási boldy. 1973 jylǵy týǵan er adam men 1974 jyly týǵan áıel adamnyń ekeýi de - Qazaqstan azamattary. Olar «Altynkól» keden beketiniń qyzmetkerlerine tapsyryldy.

Beıneý shekarashylary «Máskeý - Dýshanbe» baǵytyndaǵy № 330 poıyzda 4 totyqusty shekara arqyly zańsyz alyp ótpek bolǵandardyń jolyn kesti. Totyqustardyń ıesi 22 jastaǵy Ózbekstan Respýblıkasynyń azamaty bolyp shyqty. Totyqustar Beıneý aýdandyq veterınarlyq baqylaý mamandaryna tapsyryldy.