40 jastan asqan áıelge bosanýǵa bola ma - akýsher-gınekolog jaýaby

<p>Jasy 40-tan asqan áıelder deni saý balalardy ómirge ákele alady. Bul týraly Almaty qalasynyń №2 perınataldyq ortalyǵynyń akýsher-gınekology Alfııa Gallıamova aıtty, dep habarlaıdy Kazinform.</p>

Dárigerdiń sózinshe, áıel 40 jastan keıin ómirge bala ákelýi múmkin, alaıda, oǵan muqııat daıyndyq pen sanaly tásil qajet. Sebebi, eresek jastaǵy júktilik keıbir qaýipti aýrýlarǵa ákelýi múmkin.

"Mysaly, gestatsııalyq qant dıabeti, gıpertonııa, olar uryq úshin óte qaýipti. Bul sheshimdi qabyldaý úshin medıtsınalyq keńes berý, psıhologııalyq daıyndyq jáne áleýmettik qoldaý mańyzdy. Qoryta aıtqanda, "40 jastan keıin bosanýǵa bola ma" degen suraq kóptegen faktorlarǵa baılanysty jáne onyń sheshimi oılastyrylǵan, jeke jáne sanaly túrde bolýy kerek", - dep atap ótti dáriger.

Ol, sondaı-aq, 40 jastan keıin ana bolǵan áıelderdiń emotsıonaldy jetilýi, turaqtylyǵy jáne tájirıbesi joǵary bolatynyn atap ótti. Bul bala tárbıesine oń áser etpek.

Dáriger zamanaýı ádister men tehnologııalar kóptegen áıelderge úlken jasta deni saý bala týýǵa múmkindik beretinin aıtty.

"Qazirgi zamanǵy medıtsınanyń basty artyqshylyqtarynyń biri — júktiliktiń erte kezeńderinde de uryqtyń múmkin bolatyn aýytqýlary men aýrýlaryn anyqtaýǵa múmkindik beretin skrınıngtik synaqtar men tekserýler júrgizý múmkindigi. Bul táýekeldi aıtarlyqtaı azaıtady jáne áıelderge sanaly sheshim qabyldaýǵa múmkindik beredi", - dedi Alfııa Gallıamova.