40 tonna mal terisi men oq-dárini Reseı asyrmaq bolǵandar ustaldy

NUR-SULTAN. QazAqparat - Shekarashylar 40 tonna iri qara mal terisin, 60 kg elik etin jáne 40-tan astam oq-dárini shekara asyrmaq bolǵandardy quryqtady. Bul jóninde Ulttyq qaýipsizdik komıtetiniń shekara qyzmetine silteme jasap QazAqparat habarlaıdy.

Shekarashylar ótken táýlikte Qazaqstan-Reseı shekarasynda birqatar zańbuzýshylyqtardy anyqtady. Atap aıtqanda Aqtóbe shekara jasaǵynyń «Jaısan» ótkizý pýnktinde jalpy salmaǵy 39,5 tonna iri qara mal terisin (quny 3 mln teńge shamasynda) zańsyz ótkizbek bolǵan eki oqıǵanyń joly kesildi. Ustalǵandar - 1990 jáne 1971 jyly týǵan Qazaqstan azamattary. Bul ispen Aqtóbe oblystyq memlekettik kirister departamenti aınalysyp jatyr.

«Sondaı-aq, Aqtóbe shekara jasaǵynyń «Álimbet» jáne Pavlodar shekara jasaǵynyń «Qosaq» pýnktilerindegi tekserý barysynda ań aýlaýǵa arnalǵan 12 kalıbrdiń jalpy sany 41 oq-dárisin alyp ótpek bolǵandar ustaldy. Ustalǵandar aýdandyq polıtsııa bólimine tapsyryldy» delingen habarlamada.

Osy kúni Petropavl shekara jasaǵynyń «Qaraqoǵa» ótkizý pýnktinde Qazaqstannan Reseıge «ÝAZ» avtomashınasymen ketip bara jatqan 1969 jyly týǵan RF azamaty ustaldy. Avtokóligin tekserý kezinde júksalǵyshtan 60 kg jýyq eliktiń eti tabyldy. Akti jasalyp, aýdandyq polıtsııa bólimine tapsyryldy.