40 myńnan astam oqýshy komandalyq sportpen aınalysady - Erlan Qojaǵapanov

NUR-SULTAN. QazAqparat – QR Mádenıet jáne sport vıtse-mınıstri Erlan Qojaǵapanov mektep oqýshylarynyń sportpen aınalysýy týraly aıtty, dep habarlaıdy QazAqparat tilshisi.

«Buqaralyq sportty damytýdaǵy baǵyttardyń biri mektep jáne stýdentter lıgalaryn ótkizý arqyly damıtyn mektep jáne stýdenttik sport bolyp otyr», - dedi E. Qojaǵapanov Májilistiń Áleýmettik-mádenı damý komıtetiniń keńeıtilgen otyrsynda.

Onyń aıtýynsha, jalpy bilim beretin mektepterde sporttyń ár túrleri boıynsha sport sektsııalarynyń jelisi keńeıýde. Mektep sportyn damytýdyń oń mysaly retinde «Ushqyr dop» (gandbol), «Teńbil dop» (fýtzal), «Bylǵary Dop» (fýtbol), «Shubar Dop» (voleıbol), «Altyn dop» (basketbol) sııaqty jobalardy iske asyrý bolyp sanalady. Olarǵa jyl saıyn Qazaqstannyń túrli óńirlerinen 40 myńnan astam oqýshy qatysady.

«Sondaı-aq, jergilikti deńgeıde 188,9 myń bala men jasóspirim qamtylǵan 602 BJK (balalar men jasóspirimder klýby), 119 dene shynyqtyrý-saýyqtyrý klýby (BJDShSK) jumys isteıdi», - dedi vıtse-mınıstr.

Budan buryn habarlanǵandaı, búgingi otyrys barysynda buqaralyq sport óńirlerdegi kóptegen azamat úshin áli de qoljetimdi emes ekeni aıtyldy.

Erlan Qojaǵapanovtyń sózine qaraǵanda, byltyr elimizdiń dene shynyqtyrý-sport qozǵalysyna 5,9 mln adam qatysqanyn aıtty.