4 jeltoqsanda QR Tuńǵysh Prezıdenti týraly «Tyǵyryqtan jol tapqan» atty fılminiń kórsetilimi bastalady

ASTANA. QazAqparat - QR Mádenıet jáne sport mınıstrliginiń tapsyrysymen Sháken Aımanov atyndaǵy Qazaqfılm kınostýdııasynyń túsirilýimen "Elbasy joly" kınoepopeıasynyń tórtinshi bólimi "Tyǵyryqtan jol tapqan" atty fılminiń tusaýkeser rásimi ótti.

Qazaqstan Prezıdenti Nursultan Nazarbaevtyń 1970-shi jyldardaǵy eńbek joly, saıasatqa endi ǵana qadam basqan sáti sýretteletin tartysqa toly fılmniń rejısseri Rústem Ábdirashev.

"Tarıhty ózegi myqty jandar qalaıtyny ras. Qazaqstan Prezıdenti, Ult Kóshbasshysy Nursultan Nazarbaevtyń san qyrly eńbek joly barlyq qazaqstandyqtarǵa úlgi bola alady", - deıdi QR Mádenıet jáne sport vıtse-mınıstri Ǵalym Ahmedıarov Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, 1 jeltoqsanda atalmysh kınojoba QR Prezıdentine kórsetilmek.

"Búgin 16:00-de "Qazaqstan" Ortalyq kontsert zalynda biz fılmniń premerasyn Elbasyǵa usynamyz. 4 jeltoqsanda Qazaqstannyń 25 qalasynda 50 kınoteatrda fılm kópshilikke tartý etiledi. 2011 jyldan beri "Elbasy joly" kınoepopeıasy túsirilip kele jatyr. Bul joba tek bizdiń elde ǵana emes, álemniń 20-dan astam elderinde ótken Qazaqstan mádenıeti men kınosy kúnderinde de úlken qoldaýǵa ıe boldy", - dep atap ótti vıtse-mınıstr.

Eske sala keteıik, bunyń aldynda kınoepopeıaǵa "Balalyq shaǵymnyń aspany" (2011), "Otty ózen" jáne "Temir taý" (2013) engen bolatyn.

"Tyǵyryqtan jol tapqan" fılmi 2014 jyly aqpan aıynda bastaldy. Kınoǵa qazaqstandyq akterlermen birge Valentın Gaft, Evgenıı Sıdıhın, Vladımır Steklov, Evgenıı Stychkın, Vıktor Sýhorýkov syndy reseılik akterler endi. Elbasynyń beınesin qazaqstandyq akter Nurlan Álimjanov somdady.