4 tamyz. QazAqparat kúntizbesi
ESTE QALAR OQIǴALAR
1974 jyly Ábdijámil Nurpeıisovtiń 1918-1920 jyldardaǵy birinshi dúnıejúzilik soǵys pen azamattyq soǵys kezinde Qazaqstanda bolǵan oqıǵalar týraly jazǵan «Qan men ter» trılogııasy SSSR Memlekettik syılyǵyn aldy.
2003 jyly Astanadaǵy Respýblıkalyq klınıkalyq aýrýhanada álemde tuńǵysh ret julynnyń júıke kletkalaryn transplantatsııalaý boıynsha operatsııa jasaldy.Patsıent eki jyl boıy aıaǵyn sezbegen bolatyn. Operatsııadan keıin ekinshi kúni onyń aıaqtaryna jan kirdi. Operatsııany sol kezdegi Qazaqstan Respýblıkasynyń Densaýlyq saqtaý mınıstri, professor Jaqsylyq Dosqalıev ótkizdi.
2004 jyly Qazaqstan Respýblıkasy Prezıdenti Ákimshiliginiń Іshki saıasat basqarmasy quramyndaǵy Qazaqstan halqy Assambleıasynyń hatshylyǵy quryldy.
2011 jyly «Juldyz» balalar qoǵamdyq uıymdarynyń respýblıkalyq odaǵy QR Tuńǵysh Prezıdentiniń Mýzeıine altyn qylyshty syıǵa tartty. Ol Ujymdyq qaýipsizdik sharty uıymyna múshe elderdiń 2008 jyly Qyrǵyzstanda ótken jas patrıottar halyqaralyq jıynynyń joǵary resmı nagradasy retinde tabystalǵan bolatyn.
2016 jyly Almatyda perzenthanalar men perınataldyq ortalyqtarǵa arnalǵan jańa medıtsınalyq servıs iske qosyldy. Ol náreste týǵan kezde bala týraly elektrondy derekterdi engizip, arnaýly bilezikke japsyrylyp, náresteniń qolyna baılap qoıýǵa arnalǵan. Osy servıstiń arqasynda bilezikterdiń jeliminiń ajyraýy, balalardyń aýysyp ketýi toqtady. Óıtkeni bileziktegi arnaýly ilmek onyń joǵalýyna, derekterdiń almasyp ketýine jol bermeıdi.
2016 jyly HHHІ jazǵy Olımpıada oıyndarynyń astanasy Brazılııanyń Rıo-de-Janeıro qalasynda Qazaqstannyń týy kóterildi. Rıoda 104 sportshy Qazaqstannyń namysyn qorǵady.
Olımpıadada medaldardyń rekordtyq jıyntyǵy (306) oınatyldy. Oıyndarǵa 207 el qatysty, onyń ishinde Kosovo men Ońtústik Sýdan alǵash ret jarys jolyna shyqty.
2017 jyly Qazaqstanda alǵash ret ES-145 tikushaǵynyń (FNPT III) ushý-navıgatsııalyq trenajerinde QR Áskerı áýe kúshteriniń ushqyshtary jattyǵa bastady. Trenajer ekıpajdyń kásibı daıyndyǵynyń sapa deńgeıin arttyryp, ushý qaýipsizdigin qamtamasyz etedi.
2017 jyly Astanada erekshe qajettiligi bar adamdardyń qatysýymen «Blind Race Astana - Paris» velomarafony bastaldy. Veloshabandozdar alty eldiń: Qazaqstan, Reseı, Belarýs, Polsha, Germanııa, Frantsııa elderiniń shekarasynan asyp, 30 qaladan ótti. Nashar kóretin jáne zaǵıp velosıpedshiler marafon barysynda 5 000 shaqyrymdy eńserdi.
2018 jyly Armenııada ótken «Dostastyq jaýyngerleri» áskerı-kásibı halyqaralyq saıysynda Qazaqstan Respýblıkasy Qarýly Kúshteriniń komandasy birinshi oryndy ıelendi. Baıqaýǵa Armenııa, Belarýs, Grekııa, Iran, Qazaqstan jáne Reseı komandalary qatysty.
2022 jyly 14 jastaǵy qaraǵandylyq Aıbek Qasymhanov Grýzııada ótken halyqaralyq mýzykalyq baıqaýda Gran-prı jeńip aldy, onyń esimi «Qazaqstannyń altyn balalary» kitabyna endi.