4 paıyzdyq avtonesıeni qalaı alýǵa bolady
4 paıyzdyq nesıe rásimdeýdiń qysqasha nusqaýlyǵy mynadaı:
1 Baǵdarlamaǵa qatysýshy adam dılerlik ortalyqqa baryp, Qazaqstanda jasalatyn kólikterdiń ishinen ózine qajetin tańdaıdy.
2. Eger ol tańdaǵan kólik (qalaǵan jıyntyǵymen qosa) bar bolsa, avtosalon VIN-kody bar tólem shotyn usynady. Ol tólem shoty 5 kúnge jaramdy.
3. Osy 5 kúnniń ishinde tutynýshy ekinshi deńgeıli bankterdiń birine baryp qolyndaǵy VIN-kody bar tólem shoty arqyly ótinim rásimdeıdi. (Ázirge bul baǵdarlama boıynsha jumys isteıtin 4 bank belgili. Olar: «Halyq bank», «Bank TsentrKredıt», «Forte bank» jáne Eýrazııalyq bank». Sonyń ishinde búgin saǵat 14.00-den bastap «Tsentr kredıt banki ǵana ótinim qabyldap bastady).
«Ónerkásipti damytý» qory» aktsıonerlik qoǵamynyń basqarma basshysy Ǵalymjan Ádıdiń aıtýynsha, osy aptanyń ishinde qalǵan úsh bank te qosylýy kerek.
4. Bank ótinimdi qabyldaǵannan keıin óziniń elektrondy kezegine tirkeıdi.
5. Nesıe berý týraly oń sheshim shyǵarý úshin bank ótinim ıesiniń tólem qabileti men nesıe tarıhyn tekseredi.
6. Ótinim maquldansa, bank kepilhat beredi.
7. Tutynýshy ol kepilhatty dılerlik ortalyqqa (avtosalonǵa) aparýy kerek. Dılerlik ortalyq tólem shotyn bergen kún men tutynýshy kepilhat ákelgen kúnniń arasynda bes kúnnen artyq ýaqyt ótpeýi kerek.
Bir adam neshe ret 4 paıyzdyq nesıe ala alady?
Bul baǵdarlamanyń ereksheligi bar. Neǵurlym kóp adam alý úshin bir azamat mundaı nesıeni 2 jylda bir-aq ret ala alady», - dedi Ǵalymjan Ádı.
Kezek qalaı baqylanady?
Kólik alǵysy kelgen adam avtosalonǵa baryp kólik tańdaıdy. Osydan keıin brondalǵan kólik týraly málimet óndirýshi kompanııanyń ishki júıesine engiziledi. Sol arqyly óndirýshi qaı qalaǵa qandaı avtomobıl qashan jetkizilýi kerek ekenin bilip otyrady.
Bul elektrondy kezek árbir óndirýshi kompanııanyń óz ishinde qalyptastyrylady. Tutynýshy osylaısha avtomobıldi brondaǵannan keıin qolyna qujat beriledi. Eger tutynýshy tańdaǵan kólik satylymda bar bolsa, VIN-kody kórsetilgen tólem shoty kórsetiledi. Osy qujatpen ekinshi deńgeıli bankke baryp, jeńildetilgen nesıe boıynsha kólik satyp alý týraly ótinim beriledi.
Eger tutynýshy tańdaǵan kólik satylymda bolmasa, óndirýshi qashan jetkiziletinin aıtady. Ádette bul aldyn ala satý-satyp alý nemese bronǵa qoıý kelisimsharty túrinde rásimdeledi.
Ádette tólem shoty avtosalonǵa tańdalǵan kólik kelip túsken sátte birden beriledi.
VIN-kody kórsetilgen tólem shotyn alǵan adamǵa 5 kún ýaqyt beriledi. Sol 5 kúnniń ishinde tutynýshy tapsyrys berip, tólem qabiletin teksertip, maquldasa, kepilhat alady. Ol kepilhatty avtosalonǵa aparady. 5 kúnniń ishinde tutynýshy qońyraýǵa jaýap bermeı nemese ózi barmaı, nemquraıdylyq kórsetse, dılerlik ortalyqtaǵy adamdar habarlasady. Onda da baılanysqa shyqpasa, ol kólik boıynsha tólem shoty basqa adamǵa beriledi.
Kólikti alý tólem shoty men banktegi protsesten ǵana turmaıdy. «Avtotsonǵa» baryp kólikti tirkeý qajet. Bul ár jeke tulǵanyń qujattardyń bárin qanshalyqty jyldam jınap, rásimdegenine baılanysty.
«Ónerkásipti damytý qory» AQ basqarma basshysy Ǵalymjan Ádıdiń aıtýynsha, ár bank óziniń derbes avtomattandyrylǵan kezek júıesin belgileıdi.
«Nesıege maquldaý alǵan azamattardyń aty-jóni sol kezekke túsedi. Osy azamattar sol tizimnen óz ótiniminiń mártebesin baqylap otyrady», - dedi qordyń basshysy.
4 paıyzdyq avtonesıeni kimder alýǵa quqyly?
«Qaaqstan Avtobıznes» qaýymdastyǵynyń vıtse-prezıdenti Anar Maqashevanyń málimeti boıynsha, 4 paıyzdyq nesıeni Qazaqstan Respýblıkasynyń azamattary ǵana ala alady. Ekinshi deńgeıli bankter tutynýshynyń nesıe tarıhy men tólem qabiletin teksergennen keıin ótinimdi maquldaý ne bas tartý týraly sheshim shyǵarady. Al shetel azamattary bul násıeden úmittene almaıdy.
Birinshi kezekte kimder nesıe alady?
«Birinshi kezekte avtosalonda bar kólik boıynsha ótinim bergen adamdar paıyzdyq avtonesıe rásimdeı alady. ıAǵnı, birinshi kezekte dep basymdyq beriletin belgili bir sanat bolmaıdy. Bári kezek negizinde retteledi», - dedi «Ónerkásipti damytý qory» AQ basqarma basshysy Ǵalymjan Ádı.
4 paıyzdyq nesıege bankte nege ústeme paıyz qosylady?
Ónerkásipti damytý qorynyń basqarma tóraǵasynyń orynbasary Rınat Gapparov 4 paıyzdyq syıaqy mólsherlemesiniń ústine qosylatyn paıyzdyq ústemeler ár bankte ár túrli bolýy múmkin ekenin aıtty.
«Jeńildetilgen avtonesıe boıynsha ǵana emes, búkil nesıeler boıynsha syıaqy mólsherlemesinen bólek jyldyq tıimdi syıaqy mólsherlemesi bar. Nesıeniń paıyzy osy turǵydan ósedi. Al Úkimet belgilegen 4 paıyz syıaqy mólsherlemesi óspeıdi. Iá, qosymsha komıssııalar men saqtandyrý shyǵyny bar. Syıaqy Úkimet qaýlysy boıynsha jeke tólenedi. Sondyqtan nesıe qymbattap otyr. Al saqtandyrýsyz nesıe ala almaısyz», - dep túsindirdi Rınat Gapparov.
Bul nesıe zeınetkerlerge berile me?
«Búginde zeınetkerler boıynsha aıtsaq, zeınet jasynyń aıasynda belgili bir kezeń bar jáne kredıtteý nesıe berý zeınet jasyna deıin ǵana kózdeledi», - dedi «Tsentr Kredıt» bankiniń ókili Gúljahan Hamıtova.
Kólik unamaı qalsa, ótinimdegi VIN-kodty ózgertýge bola ma?
«Avtonesıe alǵysy keletin tutynýshylarǵa myna málimetti jetkizý mańyzdy. Avtosalonda bar kólikke ótinim berip, sol boıynsha nesıeni jyldam ala qoıý múmkin emes. Baǵdarlama sharty boıynsha, kezekte kórsetilgen kóliktiń markasy men modelin ózgertýge bolmaıdy. Tutynýshy VIN-kody bar tólem shotyn alyp qoıǵan bolsa, basqa kólikke aýystyra almaıdy. Aınyp qalsa, basqa kólik alý úshin qaıtadan basynan bastap kezekke turý kerek bolady», - dedi qordyń ókili. Sondaı-aq, ol kezektiń ıesin de ózgertý múmkin emes ekenin eskertti. «Naqty bir adamnyń atyna jazylǵan tólem shotyn basqa adamǵa berýge ruqsat joq. ıAǵnı tólem shotyndaǵy jeke tulǵanyń aty-jónin órgertýge bolmaıdy. Sonda tólem shotynda kórsetilgen kóliktiń túrin de, adamnyń atyn da ózgertý múmkin emes», - dedi Rınat Gapparov.