4 paıyzdyq avtonesıe baǵdarlamasy jalǵasa ma

ASTANA. QazAqparat - Qazaqstannyń avtomobıl salasyndaǵy kásiporyndary odaǵynyń basqarma tórǵasy Oleg Alferovtyń aıtýynsha, ótken aıda jeńildikpen avtonesıe alýǵa arnalǵan memlekettik baǵdarlamanyń ekinshi transhy ıgerildi. Jalpy, atalǵan bastama aıasynda Ulttyq qordan 26 mlrd.teńge bólinip, 8 myńǵa jýyq Qazaqstan azamaty 4 paıyzdyq nesıemen jeke kóligin satyp aldy, dep habarlaıdy QazAqparat tilshisi.

«Bul baǵdarlama ulttyq valıýtamen, ıaǵnı teńgemen beriletin nesıeniń tapshylyǵyn, oǵan degen qazaqstandyqtardyń suranysyn kórsetti. Ashyǵyn aıtý kerek, osyndaı bastamalardyń tapshylyǵy el azamattarynyń otandyq taýarlardy satyp alýlaryna qolbaılaý bolyp otyr», - deıdi O.Alferov.

Onyń aıtýynsha, memleket sol 26 mlrd. teńgeni 4 paıyzdyq mólsherlememen bólse de, qazirdiń ózinde 1 mlrd. teńgedan astam paıda kórip otyr. Al osy baǵdarlamany ary qaraı jalǵastyryp, oǵan qosymsha qarjy bólýdiń arqasynda taǵy myńdaǵan qazaqstandyqtar óz kólikterine qol jetkize alady.

«Baǵdarlama qolǵa alynǵaly beri 7732 adam avtokólik mindi. Sonyń ishinde tehnıka da bar. Aıta keter jáıt, Eýropa elderinde ondaı baǵdarlamalar aıasynda paıyzdyq mólsherlemeni sýbsıdııalaıdy, ıaǵnı bıýdjettiń aqshasyna banktiń shyǵyndaryn jaýyp, adamǵa kólikti satyp alýǵa kómektesedi. Sóıtip, úkimet mashına jasaý ónerkásibine qoldaý jasaıdy. Bul, kóp jaǵdaıda, qaıtarymsyz qarjy. Bizde bolsa, 4 paıyzdyq avtonesıege bólingen memleket qarjysy qaıtarylady. Úkimet qoldaý sharalaryn jasap qana qoımaı, naqty paıyzdyq ústemeaqyǵa ıe bolady. Demek, bul - qaıtarymdy aqsha. Sondyqtan bul baǵdarlama jalǵasyn tapsa, quba-qup. Ol halyqqa da, úkimetke de, kólik shyǵarýshy kompanııalarǵa da tıimdi bolyp tur», - dep atap kórsetti O.Alferov.