4 óńirge arnalǵan qoımadaǵy dári tapshylyǵy: «SQ-Farmatsııa» jaýap berdi

NUR-SULTAN. QazAqparat - Aqtóbe oblysyndaǵy «SQ-Farmatsııa» qoımasynda birqatar buzýshylyqtyń oryn alýyna, ıaǵnı dári-dármek qorynyń jetispeýine qatysty atalǵan uıym resmı túsinikteme berdi, dep habarlaıdy QazAqparat tilshisi.

«Qazirgi ýaqytta (22 qazan) Aqtóbe qalasyndaǵy «SQ-Farmatsııa» fılıalynyń qoımasyna Almaty men Shymkent qalasynan dári-dármek jetkizildi. Sanmen aıtqanda, 186,4 mln teńgeni quraıtyn 53 ataýly dári-dármek. Odan ári dári-dármekter Batys Qazaqstan, Mańǵystaý jáne Atyraý oblystarynyń medıtsınalyq uıymdaryna jetkiziledi. ıAǵnı Aqtóbe habyndaǵy dári-dármekter qoımada turmaıdy, qajetti óńirlerge birden jóneltiledi. Aqtóbege dári-dármekti jetkizý apta saıyn júzege asyrylýda. Jalpy, óńirlerge dári-dármek qory Nur-Sultan, Almaty jáne Shymkent sekildi iri qalalardan jetkiziledi«, - dedi «SQ-Farmatsııa» JShS-nyń baspasóz hatshysy Aısulý Mustafaeva tilshilerge bergen suhbatynda.

Eske sala ketsek, buǵan deıin QR Sybaılas jemqorlyqqa qarsy is-qımyl agenttigi Aqtóbe oblysyndaǵy «SQ-Farmatsııa» qoımasynda birqatar buzýshylyqty anyqtaǵanyn habarlaǵan bolatynbyz.

Atap aıtqanda, tekserý kezinde «SQ-Farmatsııa» vırýsqa qarsy«Avıfavır» preparatynyń satyp alynýyna qatysty naqty málimet bere almady. Onymen qosa, «SQ-Farmatsııa» JShS-niń fılıal ókili Nurlan Jubanyshev kóptegen dári-dármek aýrýhanalarǵa jetkizilip qoıǵanyn aıtqanymen, sońǵy partııalar qaıda jáne qandaı mólsherde jetkizilgeni týraly suraqqa jaýap berýden qınalǵan.

Osydan keıin batystyń 4 óńiri – Aqtóbe, Batys Qazaqstan, Atyraý jáne Mańǵystaý oblystaryna qajetti eki aılyq dári qorynyń jasaqtalǵanynan qatysty kúmán týyndaǵan.

Budan bólek, monıtorıngilik top barǵan Aqtóbedegi 4 medıtsınalyq uıymnyń qoımalarynda tıisti dári-dármekterdiń barlyq túri bolmaı shyqqan.