4 myńnan astam ózbek azamaty aptap ystyq saldarynan aýrýhanaǵa jatqyzyldy

TAShKENT. QazAqparat – Úsh kún ishinde Ózbekstanda aptap ystyq saldarynan 4 myńnan astam adam aýrýhanaǵa jatqyzyldy, dep habarlaıdy QazAqparat menshikti tilshisi eldiń Densaýlyq saqtaý mınıstrligine silteme jasap.

Vedomstvonyń habarlaýynsha, 17-20 shilde aralyǵynda ystyq aýa raıyna baılanysty respýblıkalyq jedel medıtsınalyq járdem qyzmetine 130 myńnan astam ótinish kelip túsken.

«Dárigerler kómegine joǵary qan qysymymen, tynys alý jetkiliksizdiginen, demikpe ustamalary jáne basqa da sozylmaly aýrýlary bar 23 421 adam júgingen. Onyń ishinde 4215 adam aýrýhanaǵa jatqyzyldy», - dep málimdedi Respýblıkalyq jedel medıtsınalyq járdem ǵylymı ortalyǵy dıspetcherlik qyzmetiniń basshysy Davlatbek ıÝldashev.

Vedomstvoda atap ótkendeı, aýa raıynyń ystyq bolýyna baılanysty 10 emhana, 923 otbasylyq dáriger pýnktinde patronajdyq qyzmetter kúsheıtilip, sozylmaly aýrýlary bar naýqastarǵa qajetti medıtsınalyq kómek ýaqytyly kórsetilýde. Sondaı-aq, búkil el boıynsha 2 762 jedel járdem brıgadasy aldaǵy ýaqytta turǵyndardan túsetin qońyraýlarǵa árdaıym daıyn.

Buǵan deıin habarlanǵandaı, 17-22 shildede Ózbekstan aýmaǵynda aýa temperatýrasy 47 gradýsqa deıin kóteriledi dep boljanǵan edi.