4 myń tilshi salalyq jýrnalıstıka negizderin oqydy - mınıstrlik

NUR-SULTAN. QazAqparat – QR Aqparat jáne qoǵamdyq damý mınıstrligi salalyq jýrnalıstıka mamandaryn daıyndaý boıynsha aýqymdy jumystardy júzege asyrýda, dep habarlaıdy QazAqparat vedomstvonyń Facebook-tegi paraqshasyna silteme jasap.

Mınıstrliktiń málimetinshe, 2021 jyly ǵana Qazaqstannyń jetekshi joǵary oqý oryndarymen birlesken kúsh-jigerdiń arqasynda memlekettik, sondaı-aq jeke menshik BAQ-tyń 4000-nan astam jýrnalısi elimizdiń áleýmettik-ekonomıkalyq ómiriniń mańyzdy salalaryn jarııa etý boıynsha tegin oqytýdan ótken.

Daıyndalǵan jýrnalıster dezınformatsııaǵa qarsy kúreste, sondaı-aq qazaqstandyqtardy jan-jaqty obektıvti aqparattyq aǵartýda BAQ pen áleýmettik jeliniń qazaqstandyq segmentin damytýǵa eleýli úles qosady dep kútilýde.

«Jalpy, qazirdiń ózinde respýblıkalyq jáne óńirlik medıa jýrnalısteri medıtsına, etnosaralyq qatynastar, din, IT salasy, ekologııa, agrarlyq sektor, qarjy jáne ekonomıka, quqyqtaný máselelerin aqparattyq jarııa etýdiń qyr-syry men erekshelikteri boıynsha oqytýdan ótti.

Ál-Farabı atyndaǵy QazUÝ, L.Gýmılev atyndaǵy EUÝ, S. Asfendııarov atyndaǵy QazUMÝ, M. Nárikbaev atyndaǵy KazGıÝÝ, Halyqaralyq aqparattyq tehnologııalar ýnıversıteti, Halyqaralyq bıznes ýnıversıteti, M. Qozybaev atyndaǵy SKÝ ýnıversıtetiniń jetekshi oqytýshylary trenıngter men semınarlardyń koýchtary boldy», delingen habarlamada.

Vedomstvonyń málimetinshe, 2021 jyldyń qyrkúıeginen bastap M. Nárikbaev atyndaǵy KazGıÝÝ bastamasymen bakalavrıat stýdentteri úshin «Jýrnalıstıka: analıtıka jáne tergeýler», sondaı-aq Ál-Farabı Atyndaǵy QazUÝ-dyń magıstratýra stýdentterine arnalǵan «Ekologııalyq jýrnalıstıka» eki jańa bilim berý baǵdarlamasy iske qosyldy.

Sondaı-aq, mınıstrlik «Medıa damytý qory» korporatıvtik qory bazasynda medıamamandardy oqytý maqsatynda mýltımedııalyq bilim berý-aqparattyq platformasyn iske qosty.

«Salalyq jýrnalıstıkany damytý josparynyń mańyzdy bóligi retinde mınıstrlik, salalyq uıymdar men salalyq kásiptik odaqtar arasynda 2021-2023 jyldarǵa arnalǵan kelisim jasalyd. Kelisim áleýmettik-ekonomıkalyq jáne eńbek qatynastaryn retteýdiń jalpy qaǵıdattaryn, salalyq jýrnalısterdi daıarlaý jónindegi taraptardyń ózara mindettemeleri men jaýapkershiligin aıqyndaıdy dep kútilýde», delingen habarlamada.