380 týroperatordyń Qazaqstanda jumys isteýge lıtsenzııasy bar

ASTANA. QazAqparat - Memlekettik elektrondyq tizilimniń derekterine sáıkes qazirgi ýaqytta týroperatorlyq qyzmetpen aınalysýǵa 380 lıtsenzııa berilgen, dep habarlaıdy QazAqparat.

Mádenıet jáne sport mınıstrligi taratqan aqparatqa sensek, shyǵý týrızmi salasynda 34 lıtsenzııa, ishki, kirip-shyǵý týrızmi salasynda – 34, al ishki, kirý týrızmi salasynda – 312 lıtsenzııa jumys istep tur.

Buǵan deıin memlekettik tizilimde qaǵaz jáne elektrondyq formattaǵy lıtsenzııasy bar 1240 týroperator bolǵan.

Olardyń kópshiligi jumysyn toqtatqan, biraq tizilimde qalǵan.

Qazirgi zańnamaǵa sáıkes kelmeıtin qujattardy lıtsenzıattardyń ózderi nemese jergilikti atqarýshy organdar toqtatty.

«Memlekettik tizilimdi jańartý baǵytynda úlken jumys atqaryldy, týroperatorlardyń ózderi de qyzmetin qoldanystaǵy zańnamaǵa sáıkes júrgizip keledi. Biz úshin qyzmet kórsetý sapasy máselesi basty nazarda. Barlyq lıtsenzıattar úshin zań aıasynda jumys isteý mańyzdy», - dedi týrızm ındýstrııasy komıtetiniń tóraǵasy Dastan Ryspekov.