375 mlrd teńgeden asatyn zańsyz shyǵarylǵan aktıvter elge qaıtaryldy

<p>ASTANA. KAZINFORM - Zańsyz shyǵarylǵan aktıvterdi qaıtarý jónindegi Memleket basshysynyń tapsyrmalaryn oryndaý úshin Bas prokýratýra basqa da jaýapty memlekettik organdarmen birlesip, tıisti keshendi sharalar atqaryp jatyr.</p>

Negizgi maqsat — mundaı aktıvterdi Qazaqstan turǵyndarynyń ıgiligi úshin zańdy aınalymǵa shuǵyl tartý.

Aktıvterdi qaıtarý protsesi qatań túrde Zańǵa sáıkes jáne Zańnyń ólshemsharttaryna sáıkes keletin adamdarǵa ǵana qatysty júrgizilip jatyr. 

«Qazirgi ýaqytta Bas prokýratýra eldegi 1 myńnan astam jáne sheteldegi 150-den astam múlik obektileri týraly málimetterdi taldaýda. Taldaýmen taǵy 600 mlrd teńgeniń baǵaly qaǵazdary qamtylǵan. Elimizde 200-den astam jáne shetelde 140 bank shottary anyqtaldy. 2 trln teńgege jýyq kúdikti tranzaktsııalar tekserilip jatyr. Osy jumystyń nátıjesinde Premer-Mınıstrdiń basshylyǵymen Komıssııa 325 mlrd teńgeden astam somaǵa aktıvterdi memleketke qaıtarý týraly kelisimder men talap qoıýlardy maquldady, onyń ishinde 272 mlrd teńge teńgerimindegi aqshalaı qarajat. Olar mańyzdy áleýmettik jáne ekonomıkalyq jobalardy júzege asyrýǵa baǵyttalatyn bolady», — dep habarlady Bas prokýratýranyń baspasóz qyzmeti.

Sondaı-aq elimizdegi jáne sheteldegi quny 50 mlrd teńgeden asatyn aktıvter memleketke berildi. Olardyń ishinde birqatar strategııalyq ken oryndary, monopolıstik kompanııalar, ondaǵan myń gektar jer, sondaı-aq óndiris obektileri, qonaq úıler, bıznes ortalyqtary, vıllalar, páterler, sándi kólikter, zergerlik buıymdar jáne taǵy basqalar.

«Budan basqa, tizilimniń keıbir sýbektileri óz erkimen jalpy quny 30 mlrd teńgeni quraıtyn joǵary tehnologııalyq ınvestjobalardy júzege asyrýǵa mindetteme aldy. Olardyń ishinde qubyrlar, qaptamalar, hımııalyq, azyq-túlik jáne t. b. ónimderdi shyǵaratyn óndiris obektileri. Osylaısha, keminde 300 jańa jumys ornyn qurý josparlanýda, jyldyq salyq tólemderi 1 mlrd teńgeden astam bolýy tıis» — delingen habarlamada.

Aktıvterdi qaıtarý protsesiniń taǵy bir mańyzdy bóligi — áleýmettik jobalardy júzege asyrý. Máselen, Tizilimdegi tulǵalar óz erkimen qyzmetterin erekshe qajettilikteri bar adamdar jáne basqa da áleýmettik osal toptar tegin paıdalana alatyn, quny 5 mlrd teńgeden asatyn zamanaýı mádenı-aǵartý ortalyǵyn salynýǵa mindetteme aldy.

Bas prokýratýranyń Aktıvterdi qaıtarý jónindegi komıtetiniń májbúrlep qaıtarý tetikterin iske asyrý sheńberinde kóptegen, onyń ishinde túsiniksiz jaǵdaıda paıda bolǵan aktıvterge qatysty talaptar qoıyldy.  

Olardyń biri boıynsha 11 mln AQSh dollarynan astam qarjyny, sondaı-aq 400 mln teńge somasyna zergerlik buıymdar men mádenı qundylyqtardy májbúrlep qaıtarý týraly sot sheshimi qabyldanyp, kúshine endi.

Jalpy, 2022 jyldan bastap ekonomıkany demonopolızatsııalaý sharalaryn qosa alǵanda jalpy somasy shamamen 1,7 trln teńgeniń aktıvteri, onyń ishinde shetelden 750 mln AQSh dollary memleketke qaıtaryldy.

Bul baǵytta jumystar jalǵasady.