37 volonter sanıtarlyq talaptardyń saqtalýyn tekserýde - Aqmola oblysy
Bul týraly Aqmola oblysy boıynsha qoǵamdyq baqylaý tobynyń úılestirýshisi Olesıa Baımova aıtty, dep habarlaıdy QazAqparat tilshisi.
«Óńirdegi qoǵamdyq baqylaý tobynyń músheleri – 37 volonter oblystyń barlyq óńirinde sanıtarlyq talaptardyń saqtalýyna tekseris júrgizýde. Jalpy, ústimizdegi jyldyń 11-shi shildesi men 1-shi qazany aralyǵynda oblysta 70 aýrýhana men provızorlyq stantsıonar, 1050 shaǵyn jáne orta bıznes, 600 gýmanıtarlyq kómek kórsetetin oryn, 4296 dárihana, 15 mektep, 370 adam kóp jınalatyn oryn, 24 blokpost tekserildi. Sol kezde karantındik jáne sanıtarlyq buzǵandarǵa tıisti yqpal etý sharalary qolǵa alyndy», – deıdi Olesıa Baımova.
Sonymen birge, ol qazirgi kezde óńirde sanıtarlyq talaptardyń, onyń ishinde áleýmettik qashyqtyq, maska rejıminiń saqtalýyna erekshe kóńil bólinip otyrǵandyǵyn atap ótti.
«Qazirgi tańda negizinen iri qalalarmen salystyrǵanda shaǵyn eldi mekenderde sanıtarlyq talaptar saqtalǵan. Tekserilgen nysandardyń kópshiligi sanıtarlyq normalarǵa saı, kire beristerine sanıtaızer ornatylǵan, qyzmetkerler men personaldarda maska jáne saýsaqqap bar. Al, iri saýda oryndary sııaqty adamdar jınalatyn nysandardyń kire beristerinde kelýshilerdiń dene qyzýy tekserilip otyrady. Demalys kúnderi keıbir iri saýda oryndary men kópshilik nysandardyń jumystary ýaqytpen shektelgendikten adam sany az. Dúkenderdiń kóbinde maska rejımi men áleýmettik qashyqtyq saqtalǵan. Bilim berý oryndaryndaǵy sanıtarlyq jaǵdaı da mektep basshylyǵy men jergilikti bıliktiń baqylaýynda.
Degenmen, azamattar tarapynan karantın talaptarynyń saqtalmaǵandyǵy jóninde shaǵymdardyń basym kópshiligi shaǵyn bızneske qatysty túsetinin eskersek, keıbir tutynýshylar maskamen bolǵanymen, kerisinshe dúken satýshylary maskasyz nemese maskany turys taqpaǵan jaǵdaılar da kezdesip qalady», - dep tolyqtyrdy Olesıa Baımova.
Eske sala keteıik, aǵymdaǵy jylǵy tamyzdyń 11-inde Densaýlyq saqtaý mınıstri Alekseı Tsoı elimizdegi medıtsınalyq mekemelerdiń ishindegi jaǵdaıdy baqylaý boıynsha halyq belsendilerinen quralǵan qoǵamdyq baqylaý qurylatynyn atap ótken edi. Bul bastama QR Aqparat jáne qoǵamdyq damý mınıstrligi tarapynan qoldaý tapqan bolatyn.