37 eldimekende gaz qubyrlary durys jumys istemeıdi - Qostanaı oblysy
Jıynǵa oblystyń aýdan-qala basshylary telekópir arqyly qatysty. Sala mamandary atqarylǵan jáne qolǵa alynǵan jumystar, ózekti máseleler jóninde baıandady. Ǵaýez Nurmuhambetov aıtqandaı, sońǵy úsh jylda el aýmaǵynda kógildir otyndy paıdalaný kezinde 384 adam japa shegip, 147-si kóz jumǵan. Bıylǵy jylý maýsymynyń ózinde 32 oqys jaǵdaı tirkelgen, 69 turǵyn zardap shegip, 28-i kóz jumǵan. Qaýipsizdik úshin kórsetiletin mindetti tehnıkalyq qyzmetke tabıǵı gazben qamtylǵan shalǵaı aýdandar muqtaj. Atap aıtqanda, 37 eldimekende gaz qubyrlaryn, tútin murjalaryn jáne jeldetkish arnalaryn tazalaý jumystary júıeli júrgizilmeıdi.
«Qoldaǵy bar málimetterge súıensek, kópshilik abonentte áýel basta jasalǵan kelisimshart bar, sóıte tura qaýipsizdik qyzmetterine qoldary jetpeı otyr. Óıtkeni ol jaqtarda mamandandyrylǵan uıymdar joq. Qoldarynda attestatsııalary bar tehnıkalyq mamandardyń issaparǵa shyǵýyna ne kedergi? Bul selqostyqtyń sebebi anyqtalýy tıis. Jaı-japsaryn aıqyndap, zerttep, bul baǵyttaǵy jumysty júıelendirý asa qajet», - dedi oblys ákiminiń orynbasary.
Al "QazTransGaz Aımaq" AQ óńirlik fılıalynyń basshysy Eskendir Qaıybjanovtyń málimdeýinshe, buǵan bir tarap qana kináli emes.
«Gaz tutyný júıesine tehnıkalyq qyzmet kórsetý jónindegi kelisimshartqa otyrýǵa kópshilik turǵynnyń erikterimen bas tartýy da túıtkildi máselege aınalyp otyr. Sol sebepti qazirgi tutynýshylar jaýapkershiligi týraly zańnama talaptaryn qatańdandyratyn kez keldi», - deıdi ol.
Shynymen de, ýaqtyly tekseris, jelilerge talapqa saı jóndeý júrgizý, kásibı mamandardyń tehnıkalyq tyńǵylyqty qyzmeti arqyly ǵana oqys jaǵdaılardyń aldyn alýǵa bolady.
Al attestatsııaly mamandary bar "RTsKÝ-Qostanaı" JShS dırektory Azamat Uzaqbaev ózderine tıesili jumystardyń atqarylyp jatqany týraly baıandady.
«Bizdiń seriktestik oblys kóleminde gaz tutyný júıesine tehnıkalyq qyzmet kórsetý quqyǵyn beretin arnaıy attestatqa ıe. Ujymda joǵary sanatty, 10-15 jyldyq eńbek ótili bar slesar-sheberler, gaz qaýpi bar jumystardy júrgizýshi jetekshiler jumys isteıdi. Turmystyq gaz qoldaný qurylǵylaryna bekitilgen keste boıynsha tehnıkalyq paıdalaný erejelerimen bekitilgen merzimde jylyna bir ret tehnıkalyq qyzmet kórsetemiz. Biraq, kóp jaǵdaıda bizdiń qolymyzdy da turǵyndardyń qyzmetimizdi alýdan bas tartýy baılaıdy», - dep túsindirdi Azamat Uzaqbaev.
Gaz mamandary bılik ókilderine keshendi sharalar qabyldap, halyq arasynda túsindirý jumystaryn júrgizýdi usyndy.
Ǵ.Nurmuhambetov tyńdalǵan baıandamalardy pysyqtaı kele birneshe mindetti aıqyndap, hattama daıyndady. Onda aıtylǵandaı, tehnıkalyq tekseris jumystaryna únemi monıtorıngter jasalyp, jiti baqylaý qoıylýy kerek jáne 10 aqpanǵa deıin qos tarapty kelisimshart máselesin ońtaılandyrý jospary jasalýy shart. Sondaı-aq, basty nazar aqparattyq-túsindirý jumystaryna bólinýi tıis, osy maqsatta aýdan-qala ákimderi jyldyq medıajospar qurý tapsyryldy.