3,6 mln teńgeden asatyn nesıe alýshylar jubaıynyń kelisimin qalaı rásimdeıdi

<p>ASTANA. KAZINFORM — Qarjy naryǵyn retteý jáne damytý agenttigi jeke tulǵalarǵa bankten qaryz ben shaǵyn nesıe berý kezinde jubaılardyń kelisimin talap etetin sharttardy naqtylaıtyn qaýly jobasyn jarııalady.</p>

«Respýblıkalyq bıýdjet týraly zańmen tıisti qarjy jylǵa belgilengen myń eselengen aılyq eseptik kórsetkish mólsherinde banktik qaryz nemese mıkrokredıt alýǵa jubaıynyń (zaıybynyń) kelisimi qajet bolatyn tutynýshylyq banktik qaryzdyń nemese tutynýshylyq mıkrokredıttiń eń tómengi mólsheri bekitilsin», — dep jazylǵan qaýly jobasynda.

Qarapaıym tilmen aıtsaq, qatardaǵy qazaqstandyqtar bankten nesıe nemese qarjy uıymdarynan shaǵyn nesıe alǵan kezde surap otyrǵan soma 1000 aılyq eseptik kórsetkishten assa, jubaıynyń kelisimin alýy kerek. 

2024 jylǵy bir aılyq eseptik kórsetkish 3692 teńge ekenin eskersek, shekti soma 3 mln 692 myń teńge degen sóz.

«Kredıt berýshi jeke tulǵaǵa kredıt berý týraly sheshim qabyldaǵannan keıin azamattyq hal aktileriniń aqparattyq júıesi (AHAJ) arqyly onyń jubaıy týraly aqparatty tekseredi ne kredıttik bıýrodan AHAJ-da bar aqparatty alady. Jubaıynyń kelisimi AHAJ-da klıenttiń jubaıy týraly aqparat bolǵan kezde talap etiledi», — delingen qujatta.

Nesıe alýshynyń jubaıy óz kelisimin qaǵaz túrinde de, onlaın tásilmen de rasta alady. Kelisim berý qujatynda myna derekter kórinis tabý kerek:

• kelisimniń resimdelgen kúni;
• klıent pen jubaıynyń tegi, aty, ákesiniń aty jáne jeke sáıkestendirý nómiri;
• rásimdeletin kredıttiń somasy, merzimi, syıaqy mólsherlemesiniń kólemi.

Qaǵaz túrinde berilgen kelisimdi notarıýs arqyly kýálandyrý qajet. 

Elektrondy kelisim berý eGov veb-portaly bıometrııalyq ıdentıfıkattaý (adamnyń bet álpetin veb-kamera arqyly birizdendirý) arqyly rásimdeledi.

Mundaı kelisimdi nesıe alýshynyń jubaıy elektrondyq tsıfrlyq qoltańba arqyly 48 saǵat ishinde kýálandyrýy qajet.